16 दुचाकींसह सराईत चोरट्याला बेड्या
पंचवटी : प्रतिनिधी
शहरात दुचाकी चोरीचे सत्र सुरू असतानाच आडगाव पोलिसांनी कारवाई केली आहे. एका सराईत दुचाकी चोरट्याला सापळा रचून अटक करण्यात आली. त्याच्याकडून 16 महागड्या दुचाकी हस्तगत करण्यात आल्या आहेत. हा संशयित मध्य प्रदेशापर्यंत चोरीच्या गाड्यांची विक्री करत असल्याचे तपासात समोर आले आहे.
अमृतधाम परिसरातील आयकॉन प्राइड इमारतीच्या पार्किंगमधून 13 फेब्रुवारी रोजी ओम राजेंद्र देवरे यांची युनिकॉर्न मोटारसायकल चोरीला गेली होती. याप्रकरणी आडगाव पोलीस ठाण्यात गुन्हा दाखल करण्यात आला होता. या गुन्ह्याचा तपास करत असताना गुन्हेशोध पथकाचे हवालदार दादासाहेब वाघ आणि इम्रान शेख यांना गुप्त बातमीदारामार्फत महत्त्वाची माहिती मिळाली.
पोलिसी खाक्या दाखवताच राजेंद्रने गुन्ह्याची कबुली दिली. त्याने नाशिक शहरासह ग्रामीण भागात आणि चक्क मध्य प्रदेशातही बनावट माहिती देऊन गाड्या विकल्याचे सांगितले. सहायक निरीक्षक बोंडे आणि उपनिरीक्षक पंचमुख यांच्या तांत्रिक मार्गदर्शनाखाली पोलिसांनी शोध घेत पल्सर (4), युनिकॉर्न (2), स्प्लेंडर (3), प्लॅटिना (2), शाईन, करिश्मा, पॅशन-प्रो आणि एचएफ डिलक्स ही वाहने हस्तगत केली. जप्त केलेल्या अनेक गाड्यांचे चेसी आणि इंजिन नंबर चोरट्याने खोडलेले होत. ही कारवाई पोलीस आयुक्त संदीप कर्णिक, उपायुक्त मोनिका राऊत, आणि साहाय्यक आयुक्त शेखर देशमुख यांच्या मार्गदर्शनाखाली वरिष्ठ पोलीस निरीक्षक उमेश पाटील, सहायक पोलीस निरीक्षक बोंडे, पोलीस उपनिरीक्षक पंचमुख, हवालदार वाघ, शेख, पोलीस अंमलदार मोरे व शक्ती पेंढारकर यांच्या पथकाने केली.
अंधाराचा फायदा घेऊन पळण्याचा प्रयत्न
संशयित आरोपी राजेंद्र हिरामण वाघमारे (वय 32, रा. ओझर) चोरीची दुचाकी घेऊन डी मार्टसमोरील मोकळ्या जागेत अंधारात उभा असल्याची माहिती मिळताच पोलिसांनी सापळा रचला. पोलिसांची चाहूल लागताच त्याने पळ काढण्याचा प्रयत्न केला. मात्र, पथकाने शिताफीने त्याला काही अंतरावरच गाठून ताब्यात घेतले.
Brilliant performance of Adgaon police