सुरगाणा : प्रतिनिधी
तालुक्यातील बोरगावजवळील चिखली येथे हौदात बुडून दोन चिमुकल्यांचा मृत्यू झाल्याची घटना घडल्याने परिसरात शोककळा पसरली आहे. मृत दर्शन जगदीश भोये (वय 4), तन्मय नीलेश भोये (वय 3, दोघे रा. चिखली) हे सकाळी दहाच्या सुमारास घराजवळ खेळत होते. जवळच घर बांधकामासाठी खोदलेल्या पाणी साठवण खड्ड्यातील पाण्यात बुडून या दोन्ही बालकांचा मृत्यू झाला आहे.
ही बाब घरच्यांच्या लक्षात येताच एकच खळबळ उडाली.पाण्यातून काढून त्यांना तत्काळ उपचारासाठी बोरगाव येथील प्राथमिक आरोग्य केंद्रात दाखल केले. प्राथमिक अहवालानुसार वैद्यकीय अधिकार्‍यांनी मृत घोषित केले. शवविच्छेदनासाठी दोन्ही मुलांना सुरगाणा ग्रामीण रुग्णालयात दाखल करण्यात आले. विच्छेदनानंतर मृतदेह नातेवाइकांच्या ताब्यात देण्यात आले. चिखली येथे अंत्यसंस्कार करण्यात आले.
दोन्ही मुले चुलतभाऊ असल्याने शोककळा पसरली आहे. चणकापूर धरणात पोहण्यासाठी पाण्यात बुडालेल्या तरुणाची घटना ताजी असताना ही घटना घडल्याने हळहळ व्यक्त करण्यात येत आहे. पालकांनी आपल्या मुलांकडे लक्ष द्यावे, असे आवाहन पोलिस प्रशासनाने केले आहे.
Two children drown in a pond in Borgaon mud