नाशिक : प्रतिनिधी
महागाई, वाढता विवाह खर्च आणि साधेपणाला मिळणारे प्राधान्य यामुळे आता अनेक जोडपी पारंपरिक थाटामाटाच्या लग्नाऐवजी थोडक्यात विवाह करून थेट विवाह नोंदणी करण्याकडे वळत असल्याचे चित्र दिसत आहे. 1 जानेवारी ते 19 मे 2026 या कालावधीत जिल्ह्यात 716 विवाहांची नोंदणी करण्यात आली आहे. त्यांपैकी 291 जोडप्यांनी फॉर्म-16 द्वारे विवाह झाल्याची नोंद केली आहे. 425 स्पेशल विवाहांची नोंद झाली आहे.
पूर्वी मोठ्या प्रमाणावर हॉल, बँड, डेकोरेशन, भोजनव्यवस्था आणि इतर खर्चिक परंपरांवर भर दिला जात होता. मात्र, आता अनेक तरुण-तरुणी आणि कुटुंबे अनावश्यक खर्च टाळून साध्या पद्धतीने विवाह करण्यास प्राधान्य देत आहेत. त्यानंतर कायदेशीर वैधतेसाठी विवाह नोंदणी केली जात असल्याने नोंदणी कार्यालयांमध्येही गर्दी वाढू लागली आहे.
विशेष विवाह अधिनियम तसेच हिंदू विवाह अधिनियमांतर्गत विवाह नोंदणीची प्रक्रिया आता तुलनेने सोपी आणि जलद झाल्याने नागरिकांचा प्रतिसाद वाढत आहे. ऑनलाइन प्रक्रिया, आवश्यक कागदपत्रांची सुलभता आणि कमी खर्च या कारणांमुळे विवाह नोंदणी अधिक लोकप्रिय होत असल्याचे प्रशासनाकडून सांगण्यात आले.
सामाजिक बदल, आर्थिक बचत आणि कायदेशीर सुरक्षितता या तिन्ही कारणांमुळे पुढील काळातही विवाह नोंदणीचा कल अधिक वाढण्याची शक्यता व्यक्त केली जात आहे.
Trend towards registered marriages, breaking the hype