नाशिक : प्रतिनिधी
शिवसेना उपनेते तथा आमदार आदित्य ठाकरे येत्या रविवारी (दि. 24) नाशिक दौर्‍यावर येत आहेत, अशी माहिती शिवसेना उपनेते दत्ता गायकवाड, जिल्हाप्रमुख डी. जी. सूर्यवंशी, नितीन आहेर, माजी आमदार वसंत गिते यांनी दिली. ठाकरे यांच्या दौर्‍याच्या नियोजनासाठी शिवसेना जिल्हा मध्यवर्ती कार्यालय, शालिमार येथील जिल्हा पदाधिकार्‍यांची बैठक घेण्यात झाली.
ठाकरे यांच्यासोबत राज्यसभा खासदार संजय राऊत, जिल्हा संपर्कप्रमुख रवींद्र मिर्लेकर, युवासेना सचिव व आमदार वरुण सरदेसाई, शिवसेना सचिव सूरज चव्हाण, शिवसेना उपनेते तथा युवासेना चिटणीस अमोल कीर्तिकर, युवासेना कोअर कमिटी सदस्य सिद्धेश शिंदे, अभिषेक शिर्के, प्रियंका जोशी, युवासेना विभागीय सचिव विराज कावडिया, युवासेना विस्तारक मानस कुवर उपस्थित राहणार आहेत.
हिंदुहृदयसम्राट शिवसेनाप्रमुख बाळासाहेब ठाकरे यांच्या जन्मशताब्दी वर्षानिमित्त नाशिक जिल्ह्यात भव्यदिव्य स्वरूपात विविध कार्यक्रमांचे आयोजन, तसेच शिवसैनिक नोंदणी अभियान व शिवसेनेची पुनर्बांधणी केली जात आहे. कला, क्रीडा, सांस्कृतिक आदींविषयी जिल्हानिहाय ग्रामीण भागातील तालुकास्तरावर गट-गणनिहाय, तर शहरात विभागनिहाय कार्यक्रमांचे आयोजन केले आहे. टेनिस बॉल स्पर्धा युवासेना चषकाचे आयोजन मखमलाबाद, नाशिक येथे करण्यात आले आहे.
व्यासपीठावर युवासेना विस्तारक मानस कुवर, युवासेना जिल्हाधिकारी राहुल ताजनपुरे, सागर कोकणे, विक्रम रंधवे, भारतीय विद्यार्थी सेना जिल्हा संघटक वैभव ठाकरे, महिला आघाडीचे जिल्हा संघटक स्वाती पाटील, नगरसेवक शैलेश ढगे, तात्या भामरे, विधानसभाप्रमुख बाळासाहेब कोकणे, शिवसेना पदाधिकारी सुनील जाधव ऋषी वर्मा, उत्तम खांडबहाले, मोहन गांगुर्डे, गोरख वाघ, विजय काळादाते उपस्थित होते. बैठकीस नाशिक जिल्हा पदाधिकारी, अंगिकृत संघटनेचे पदाधिकारी व शिवसैनिक उपस्थित होते.
Aditya Thackeray to visit Nashik on Sunday