’मन की बात’मधून पंतप्रधानांचे पुन्हा आवाहन
नवी दिल्ली : प्रतिनिधी
पंतप्रधान नरेंद्र मोदी यांनी त्यांच्या लोकप्रिय रेडिओ कार्यक्रम ‘मन की बात’च्या 135 व्या भागात देशाला संबोधित करताना अनेक महत्त्वाच्या विषयांवर चर्चा केली.
पश्चिम आशियातील युद्धसदृश परिस्थितीचा संदर्भ देत, त्यांनी नागरिकांना संयम बाळगण्याचे आवाहन केले. पंतप्रधान म्हणाले की, त्यांनी यापूर्वीच नागरिकांना शक्यतोवर काही कालावधीसाठी सोने खरेदी टाळण्याचे आवाहन केले होते. त्यांनी परदेश प्रवास पुढे ढकलण्याचा, कारपूलिंगला प्रोत्साहन देण्याचा आणि पेट्रोल व डिझेलची बचत करण्याचा सल्लाही दिला. त्यांनी शेतकर्‍यांना नैसर्गिक आणि रसायनमुक्त शेती पद्धतींचा अवलंब करण्याचे आणि रासायनिक खतांऐवजी सेंद्रिय खतांचा वापर वाढवण्याचे आवाहनही केले.
पंतप्रधान मोदी म्हणाले की, त्यांच्या आवाहनाला सकारात्मक प्रतिसादही मिळाला याचा त्यांना आनंद आहे.
त्यांनी स्पष्ट केले की, अनेक कुटुंबांनी यावर्षी कौटुंबिक कार्यक्रमांसाठी नवीन सोने न खरेदी करण्याचा निर्णय घेतला आहे आणि गरज पडल्यास जुन्या सोन्याचा पुनर्वापर केला जाईल. त्यांनी हेही नमूद केले की, अनेक नागरिकांनी सोशल मीडियावर सांगितले आहे की, त्यांनी परदेश प्रवास पुढे ढकलला आहे. कारपूलिंगबद्दलची जागरूकताही वाढली आहे आणि अनेक लोक आता एकाच दिशेने प्रवास करण्यासाठी सामायिक वाहनांचा वापर करत आहेत. यामुळे केवळ इंधनाची बचत होत नाही, तर वाहतूक कोंडी आणि प्रदूषणही कमी होत आहे, असेही पंतप्रधान मोदी यांनी सांगितले.
बस आणि मेट्रो वापर वाढला
पंतप्रधान म्हणाले की, लोक आता बस आणि मेट्रोसारख्या सार्वजनिक वाहतूक सुविधांचा अधिक वापर करत आहेत, हे एका सकारात्मक बदलाचे लक्षण आहे. त्यांनी असेही निदर्शनास आणून दिले की, देशाच्या अनेक भागांमध्ये नैसर्गिक शेती आणि सेंद्रिय खतांची मागणी वाढली आहे. पंतप्रधान मोदी म्हणाले, मला आनंद आहे की, आपण भारतीय या जागतिक संकटाचा एकत्रितपणे सामना करत आहोत. मला विश्वास आहे की, जनसहभागाची ही शक्ती आपल्याला अधिक मजबूत करेल आणि यशस्वी करेल.
Avoid buying gold; use petrol sparingly!