वॉशिंग्टन/तेहरान
अमेरिका आणि इराण यांच्यातील शांततेच्या सर्व आशा पुन्हा एकदा धुळीस मिळाल्या आहेत. दोन्ही देशांमध्ये कोणताही करार अंतिम होण्यापूर्वीच, नव्याने भीषण लष्करी संघर्ष सुरू झाला आहे. होर्मुझच्या सामुद्रधुनीमध्ये इराणने गॅलेक्सी या कंटेनर जहाजाला लक्ष्य केल्यानंतर, राष्ट्राध्यक्ष डोनाल्ड ट्रम्प यांच्या आदेशानुसार अमेरिकेने इराणविरोधात जोरदार प्रत्युत्तरात्मक कारवाई सुरू केली आहे.
अमेरिकेच्या सेंट्रल कमांडने (सेंटकॉम) एका आठवड्यात तिसर्‍यांदा इराणवर मोठे हवाई हल्ले केले आहेत. ज्यामध्ये इराणचे 140 हून अधिक लष्करी तळ उद्ध्वस्त करण्यात आले आहेत. या हल्ल्यानंतर संपूर्ण आखाती प्रदेशात युद्धासारखी परिस्थिती निर्माण झाली आहे.
अमेरिकेच्या हल्ल्यानंतर इराणनेही तात्काळ प्रत्युत्तर दिले आहे. इराणने संयुक्त अरब अमिरात (युएई), कुवेत, कतार आणि बहरीनच्या दिशेने क्षेपणास्त्रे आणि ड्रोन डागले आहेत. इराणची हवेतील क्षेपणास्त्रे पाडण्यासाठी आपली हवाई संरक्षण प्रणाली सक्रिय करण्यात आल्याचे युएईने म्हटले आहे. देशभरात प्रचंड स्फोटांचे आवाज ऐकू आले. कतार बहरीनमध्ये आणीबाणी जाहीर करण्यात आली असून नागरिकांना तात्काळ सुरक्षित ठिकाणी आश्रय घेण्यासाठी सायरन वाजवण्यात आले आहेत.
तीनशेहून अधिक लष्करी तळांवर बॉम्बहल्ला
अमेरिकेच्या सेंट्रल कमांडच्या माहितीनुसार, गेल्या तीन दिवसांच्या सततच्या कारवाईत इराणच्या 300 हून अधिक लष्करी ठिकाणांना लक्ष्य करण्यात आले आहे. या ताज्या हल्ल्यांमुळे इराणच्या क्षेपणास्त्र प्रक्षेपण स्थळे, ड्रोन डेपो, नौदल तळ, शस्त्रागारे आणि दळणवळण नेटवर्कचे मोठे नुकसान झाले आहे. इराणच्या सरकारी माध्यमांनुसार, होर्मोझगान आणि बुशेहर प्रांतांमधील जास्क, असलुयेह आणि कांगन यांसारख्या भागांमध्ये 10 हून अधिक मोठे स्फोट ऐकू आले आहेत. या हल्ल्यांमध्ये कोणतीही जीवितहानी झाल्याची अधिकृत माहिती अद्याप उपलब्ध नाही.
Iran shaken by US attacks, emergency in Qatar-Bahrain