एकनाथ शिंदे : गुजरातीमधून भाषणाची सुरुवात
वडनगर : विशेष प्रतिनिधी
पंतप्रधान नरेंद्र मोदी यांच्या 76 व्या वाढदिवसानिमित्त गुरुवारी त्यांच्या जन्मगावी, म्हणजेच गुजरातमधील वडनगर येथे देशव्यापी ‘सेवा संकल्प अभियाना’चा भव्य शुभारंभ करण्यात आला. या विशेष सोहळ्याला महाराष्ट्राचे उपमुख्यमंत्री एकनाथ शिंदे यांनी प्रमुख अतिथी म्हणून हजेरी लावली होती. या कार्यक्रमात उपस्थितांना संबोधित करताना शिंदे यांनी आपल्या भाषणाची सुरुवात थेट स्थानिक गुजराती भाषेतून केली. “वडनगरनी धरतीना सपूत, देश अने दुनियाना लाडला बनी गया छे. आज आ धरती ऊपर आवीने गर्व अनुभवूं छूं,” असे त्यांनी म्हटले. त्यांनी उपस्थितांची मने जिंकली आणि त्यानंतर पंतप्रधान मोदींच्या देशसेवेचे भरभरून कौतुक केले.
पंतप्रधान मोदींच्या प्रशासकीय आणि सार्वजनिक सेवेतील 25 वर्षांच्या यशस्वी कारकिर्दीचा गौरव करताना एकनाथ शिंदे यांनी मोदींच्या उत्तुंग नेतृत्वाचा गौरव केला. मोदीजींच्या कर्तृत्वाची उंची हिमालयाएवढी प्रचंड आहे, अशा गौरवोद्गारात त्यांनी पंतप्रधानांच्या कार्याचा महिमा विशद केला. वडनगर या छोट्याशा गावातून उडालेल्या एका ठिणगीने आज संपूर्ण भारतात विकासाची आणि प्रगतीची एक मोठी क्रांती घडवली आहे, असे सांगत शिंदे यांनी मोदींच्या दूरदृष्टीला आणि त्यांच्या अथक परिश्रमांना सलाम केला.
‘सेवा संकल्प अभियाना’चा एक भाग म्हणून आयोजित करण्यात आलेल्या वडनगर ते वाराणसी या भव्य युवा यात्रेला (बाइक रॅली) उपमुख्यमंत्री एकनाथ शिंदे आणि केंद्रीय गृहमंत्री अमित शहा यांच्या उपस्थितीत हिरवा झेंडा दाखवून रवाना करण्यात आले. या संपूर्ण सोहळ्यात देशभरातील सत्ताधारी मित्रपक्षांच्या नेत्यांपैकी एकनाथ शिंदे यांना मिळालेले विशेष आमंत्रण आणि मंचावरील त्यांची उपस्थिती राजकीय वर्तुळात विशेष लक्षवेधी ठरली.
या दौर्‍याच्या निमित्ताने शिंदे यांनी वडनगरमधील हाटकेश्वर महादेव मंदिर परिसरात विविध धार्मिक विधी आणि जलपूजन कार्यक्रमांमध्येही सहभाग
नोंदवला.
The stature of Modi’s achievements is as towering as the Himalayas.