सिडको : प्रतिनिधी
जलालपूर शिवारात आळंदी नदीवरील पुलानजीक कार अपघातात एक ठार, तर चार जण जखमी झाल्याची घटना घडली. दुगावकडून येताना या पुलाजवळ मोठे वळण आहे. तिथे अंदाज आला नाही तर गाडी नियंत्रणात राहत नाही. यापूर्वीही तिथे असे दोन अपघात झालेले आहेत. या अपघातात कार थेट नदीपात्रात पडली.
पोलिसांच्या माहितीनुसार, गिरणारे येथून नाशिकच्या दिशेने येत असताना जलालपूर शिवारातील वळणावर भरधाव वाहनावरील नियंत्रण सुटल्याने मंगळवारी (दि. 29) पहाटे 4.30 वाजेच्या सुमारास घडला. यावेळी कार (एमएच 15-जेएफ 5709) पुलावरून खाली कोसळले. याठिकाणी पुलाला कठडेही नसल्याचे सांगण्यात येते. यात एका तरुणाचा मृत्यू झाला असून, तीन जण जखमी झाले आहेत. जखमींवर रुग्णालयात उपचार सुरू आहेत.
प्रिन्स अमित चव्हाण (वय 20, रा. हनुमानवाडी, नाशिक) असे मृत तरुणाचे नाव आहे. अपघातानंतर स्थानिक नागरिकांच्या मदतीने जखमी प्रिन्स चव्हाण याला जिल्हा रुग्णालयात उपचारासाठी दाखल करण्यात आले होते. मात्र, डॉक्टरांनी तपासणी करून त्याला मृत घोषित केले. याप्रकरणी जिल्हा रुग्णालय पोलीस चौकीत नोंद करण्यात आली असून पुढील तपास पोलीस करीत आहेत.
One killed in car accident near bridge in Jalalpur area.