सिंहस्थाच्या पार्श्वभूमीवर प्रशासनाचा निर्णय
नाशिक : प्रतिनिधी
सिंहस्थ कुंभमेळ्याच्या पार्श्वभूमीवर शहरात रामायणकालीन वारशाला आधुनिक तंत्रज्ञान, थीम आधारित वास्तुकला, मनोरंजन, संस्कृती आणि अध्यात्म यांच्याशी जोडणारे जागतिक दर्जाचे पर्यटनस्थळ विकसित करण्याचा निर्णय महापालिका प्रशासनाने घेतला आहे. या पार्श्वभूमीवर नाशिकमध्ये रामायण थीम पार्क विकसित करण्यासाठी महासभेवर हा प्रस्ताव सादर केला आहे.
शहराचा पौराणिक आणि ऐतिहासिक वारसा जगासमोर अधिक प्रभावीपणे मांडण्यासाठी नाशिकमध्ये भव्य व जागतिक दर्जाचे रामायण थीम पार्क उभारले जाणार आहे. आडगाव येथील सर्व्हे क्र. 772 मधील महापालिकेच्या राखीव जमिनीवर सिंहस्थ कुंभमेळ्याच्या पार्श्वभूमीवर हा प्रकल्प साकारला जाणार आहे. हा संपूर्ण प्रकल्प सार्वजनिक-खाजगी भागीदारी (डिझाइन, बिल्ड, फायनान्स, ऑपरेट आणि ट्रान्सफर) तत्त्वावर राबविला जाणार आहे. यामुळे महापालिकेच्या तिजोरीवर कोणताही अतिरिक्त आर्थिक भार न पडता शहराला एक आंतरराष्ट्रीय दर्जाचे पर्यटन केंद्र मिळणार आहे. सिंहस्थ कुंभमेळ्याच्या दृष्टीने हा उपक्रम महत्त्वाचा ठरणार आहे. नाशिकमध्ये येणार्‍या लाखो भाविक आणि पर्यटकांना केवळ काही वेळेसाठी मर्यादित न ठेवता, त्यांचा नाशिकमधील मुक्काम वाढवणे आणि कौटुंबिक पर्यटनाला चालना देणे, हा या प्रकल्पामागील मुख्य उद्देश आहे. या प्रकल्पामुळे नाशिकमधील हॉटेल्स, ट्रॅव्हल्स, वाहतूक आणि स्थानिक व्यवसायांना मोठी उभारी मिळेल. तसेच बांधकाम आणि प्रकल्प सुरू झाल्यानंतरच्या टप्प्यात सुरक्षा, हॉस्पिटॅलिटी, रिटेल आणि सांस्कृतिक क्षेत्रात हजारो प्रत्यक्ष व अप्रत्यक्ष रोजगाराच्या संधी निर्माण होतील.
पार्कची वैशिष्टये अशी
या थीम पार्कमध्ये अत्याधुनिक तंत्रज्ञानाचा कल्पकतेने वापर केला जाणार आहे. रामायणातील विविध प्रसंग जसे की, बालकांड, अयोध्याकांड, अरण्यकांड, सुंदरकांड आणि युद्धकांड पर्यटकांना प्रत्यक्ष अनुभवता येणार आहे. यासाठी 360 अंश इमर्सिव्ह डोम, रॉयल अ‍ॅम्फीथिएटर, मोक्ष घाट, श्रीराम मंदिराची प्रतिकृती, लॅण्डस्कॅप स्पिरिच्युअल स्पेसेस, फूड कोर्ट यांसह इतर पूरक पर्यटन सुविधांचा समावेश केला जाणार आहे. पर्यटकांच्या मनोरंजनासाठी आणि सोयीसाठी या पार्कमध्ये खरेदीसाठी विशेष दुकाने उपलब्ध करून दिली जाणार आहेत.
World-class Ramayana theme park in the city