शहरात हजार वाडे धोकेदायक; महापालिकेच्या नोटिसा

नाशिक : प्रतिनिधी
शहरातील धोकादायक वाड्यांना महापालिका प्रशासन पावसाळ्यच्या पार्श्वभूमीवर नोटिसा बजावत असते. दरम्यान, धोकादायक वाडे असूनही भाडेकरू, रहिवासी दुर्लक्ष करत असल्याचे चित्र आहे. बुधवारी (दि.1) मेनरोड परिसरातील वाडा कोसळल्याची घटना घडली. त्यानंतर शहरातील धोकादायक वाड्यांचा प्रश्न पुन्हा एकदा ऐरणीवर आला आहे. याआधी जुन्या नाशिकसह पूर्व विभागात वाडे पडल्याच्या घटना घडल्याने खबरदारीचा उपाय म्हणून महापालिका प्रशासनाने धोकेदायक वाड्यांना नोटिसा बजावत सुरक्षितस्थळी जाण्याच्या सूचना केल्या आहेत. मात्र, रहिवासी वाडे सोडण्यास तयार नसल्याचे चित्र आहे.
पावसाळ्याच्या पार्श्वभूमीवर संभाव्य धोका टाळण्यासाठी महापालिकेने शहरातील धोकादायक इमारतींचा सर्व्हे केला होता. त्यात या इमारती व वाडे कधीही कोसळू शकतात, त्यामुळे खाली कराव्यात, अशा नोटिसा महापालिकेने मे महिन्यात इमारत मालकांना बजावल्या होत्या. मात्र, त्यापैकी कोणीही या नोटिसींची दखल घेतली नाही. पावसाळा सुरू असून, अशा परिस्थितीत जीर्ण व धोकादायक इमारती कोसळण्याचा धोका असतो. हा धोका टाळण्यासाठी महापालिकेने शहरातील हजाराहून अधिक इमारत मालकांना नोटीस बजावून या इमारती तत्काळ रिकाम्या कराव्यात किंवा त्याची दुरुस्ती करावी, अशी नोटीस बजावली आहे.
महापालिका धोकादायक इमारतींच्या मालकांना महाराष्ट्र महानगरपालिका अधिनियम 265 (अ) अन्वये नोटीस बजावते. 1950 मधील तरतुदीनुसार नोटिसा दिल्यानंतर होणार्‍या जीवित किंवा वित्तहानीस इमारत मालक जबाबदार असतो. त्यात दंडात्मक शिक्षेचीही तरतूद करण्यात आली आहे. शहरातील जुने नाशिक, पंचवटी, नाशिकरोड, देवळालीगाव, सातपूर या गावठाणांमध्ये नागरिक आजही जुनी घरे, इमारती आणि वाड्यांमध्ये राहत आहेत. इमारती व वाडे धोकादायक असूनही नागरिक त्यात वास्तव्याला आहेत.

विभागवार धोकादायक वाड्यांची माहिती
नाशिक पश्चिम –  600
पंचवटी             –  198
नाशिक पूर्व       – 117
सातपूर             –  68
नवीन नाशिक   –  25
नाशिकरोड       –  69
एकूण              –  1,077

A thousand *wadas* in the city are dangerous; Municipal Corporation issues notices.