सहलीची बस कोसळली दरीत, पिंपळगाव चे विद्यार्थी जखमी

कराडजवळ पर्यटक बसचा भीषण अपघात; 40-45 विद्यार्थी-शिक्षक जखमी
नाशिक – प्रतिनिधी

पुणे–बेंगळुरू महामार्गावरील सातारा जिल्ह्यातील कराडजवळ वाठार गावच्या हद्दीत नाशिकमधील विद्यार्थ्यांची सहल घेऊन जाणारी बस भीषण अपघातग्रस्त झाली. निफाड तालुक्यातील पिंपळगाव बसवंत येथील लेट बी. पी. ज्युनियर कॉलेज ऑफ सायन्सच्या विद्यार्थ्यांची ही बस जवळपास 20 फूट खोल दरीत कोसळली. अपघातात सुमारे 40 ते 45 विद्यार्थी व शिक्षक जखमी झाले असून त्यांना तातडीने कराड येथील कृष्ण हॉस्पिटलमध्ये हलविण्यात आले आहे.

सकाळी सुमारे 6.45 वाजता हा अपघात घडला. कराड तालुका पोलीस ठाणे हद्दीतील वाठार-ब्रीज परिसरात पुलाचे काम सुरू असताना बसचा तोल जाऊन ती खाली कोसळली. दुर्घटनाग्रस्त वाहन क्रमांक MH 04 GP 0920 असून ती खाजगी ट्रॅव्हल्सची बस असल्याचे समजते.

अपघाताची माहिती मिळताच पोलिसांनी घटनास्थळी धाव घेत बचावकार्य हाती घेतले. जखमी विद्यार्थ्यांवर कृष्ण हॉस्पिटलमध्ये उपचार सुरू असून काहींची प्रकृती गंभीर असल्याचे सूत्रांनी सांगितले. अपघाताचे नेमके कारण मात्र अद्याप स्पष्ट झालेले नाही.