सोनसाखळी चोरणार्‍या सराईत चोराला एका तरुणाने पकडले

न्यायालयाकडून दोन दिवसांची पोलिस कोठडी

सिन्नर : प्रतिनिधी
शहरात दुचाकीवरून आलेल्या दोन चोरट्यांनी महिलेच्या गळ्यातील सोनसाखळी ओढून नेण्याचा प्रयत्न केल्याची घटना बुधवारी (दि. 28) सायंकाळी सुमारे सहा वाजेच्या सुमारास घडली. मात्र, एका तरुणाने दाखवलेल्या धाडसामुळे मोठा अनर्थ टळला. तरुणाने सराईत गुन्हेगाराला रंगेहाथ पकडले, तर त्याचा साथीदार गर्दीचा फायदा घेत फरार झाला.
मनीषा दत्तात्रय माळी (39, रा. रमाई अपार्टमेंट, वृंदावननगर, सिन्नर) या सरदवाडी रोडने अजिंक्यतारा चौकाकडे पायी जात असताना काळ्या रंगाच्या दुचाकीवरून दोन इसम तेथे आले. दुचाकी चालवत असलेल्या इसमाने महिलेला धमकावत मारहाण केली, तर मागे बसलेल्या इसमाने त्यांच्या गळ्यातील सुमारे अर्धा तोळा वजनाची, अंदाजे 70 हजार रुपये किमतीची सोन्याची पोत ओरबाडली. झटापटीत महिला रस्त्यावर कोसळली.
ही घटना पाहताच निखिल उगले या तरुणाने प्रसंगावधान राखत थेट दुचाकीवर झडप घातली. त्याने आरोपी ऋषिकेश अशोक राजगिरे (24, रा. चुंचाळे, ता. अंबड, जि. नाशिक) याला दुचाकीवरून खाली खेचले. या झटापटीत दुचाकी रस्त्यावर कोसळली. मात्र, त्याचा दुसरा साथीदार घटनास्थळावरून
पसार झाला.
घटनेची माहिती मिळताच अनिल वराडे घटनास्थळी दाखल झाले. पोलिस येईपर्यंत नागरिकांच्या मदतीने आरोपीला पकडून ठेवण्यात आले. त्यानंतर त्याला सिन्नर पोलिसांच्या ताब्यात देण्यात आले.
पोलिस तपासात ऋषिकेश राजगिरे हा सराईत गुन्हेगार असल्याचे निष्पन्न झाले आहे. त्याच्यावर जिल्ह्यात खून, चोरी व दरोडा यांसारख्या गंभीर स्वरूपाच्या गुन्ह्यांची नोंद आहे. तसेच चोरीसाठी वापरण्यात आलेली दुचाकी ही नाशिकच्या सातपूर परिसरातून दोन दिवसांपूर्वी चोरीस गेलेली असल्याचेही तपासात उघड झाले.
राजगिरे याला न्यायालयात हजर केले असता न्यायालयाने त्याला दोन दिवसांची पोलिस कोठडी सुनावली आहे.
फरार साथीदाराचे नाव निष्पन्न झाले असून, लवकरच त्याला अटक करण्यात येईल, असा विश्वास पोलिस निरीक्षक हेमंतकुमार भामरे यांनी व्यक्त केला. या प्रकरणी सिन्नर पोलिस ठाण्यात भारतीय न्यायसंहिता कलम 309(4), 63 नुसार गुन्हा दाखल करण्यात आला आहे.

70 हजारांचा मुद्देमाल जप्त

राजगिरे याने माळी यांच्या गळ्यातील अर्धा तोळा वजनाची सोन्याची पोत ओरबाडली होती. त्यातील अर्धी पोत महिलेच्या हातात राहिली होती. उर्वरित पोत पोलिसांनी आरोपीकडून जप्त केली आहे.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.