नैसर्गिक नाला बंदिस्त करण्याचा प्रयत्न पडला महागात

नाशिक : प्रतिनिधी

अनधिकृतपणे नैसर्गिक नाला बंद करून काम करणार्‍या विकासकावर महापालिकेच्या वतीने म्हसरूळ पोलीस ठाण्यात तक्रार करण्यात आली होती. याप्रकरणी पोलीस ठाण्यात एमआरटीपी कायद्यानुसार मिळ्कतधारक तिवारी व अग्रवाल यांच्यावर गुन्हा दाखल करण्यात आला आहे. पंचवटीतील पालिकेचे शाखा अभियंता पंकज अरुण बाप्ते यांनी म्हसरूळ पोलीस ठाण्यात तक्रार दिली होती.
पंचवटी विभागातील म्हसरूळ शिवारातील वरवंडी रस्त्यावरील नैसर्गिक नाला बंदिस्त करण्याचा प्रकार सुरू असल्याचे समजताच पालिकेने तिवारी व अग्रवाल यांच्यावर गुन्हा दाखल करण्यात यावा, अशी तक्रार पोलीस ठाण्यात देण्यात आली.
याबाबत माहिती अशी की, म्हसरूळ शिवारातील वरवंडी रस्ता येथील परिसरात शाखा अभियंता बाप्ते हे गुरुवारी (दि. 2) पाहणी करत असताना त्यांना स.न. 71 व स.नं. 171 च्या लगतच्या नाल्यामध्ये 600 मी. व्यासाचे तीन रांगेत आरसीसी पाइप टाकून प्रवाहित असलेला नैसर्गिक नाला बंदिस्त करण्याचे काम विनापरवानगी सुरू असल्याचे निदर्शनास आले. यावेळी मिळकतधारक यांच्या वतीने पाइप टाकणार्‍या मक्तेदार यांना सुरू असलेले अनधिकृत काम तात्काळ बंद करण्यास सांगितले आहे. सदर जागा ही कोणाच्याही मालकीची नसून, नैसर्गिक नाल्याची जागा आहे.
याप्रकरणी महाराष्ट्र प्रादेशिक नियोजन व नगररचना अधिनियम 1966) मधील कलम 52 नुसार जागेच्या वापरात विनापरवानगी बदल/अनधिकृत बांधकाम करणे अवैध असून, मिळकतधारकांनी मनपाची कुठलीही पूर्वपरवानगी न घेता अनधिकृतपणे सदर नैसर्गिक नाला आरसीसी पाइप टाकून बंदिस्त करत आहेत. त्यानुसार मिळकतधारक तिवारी व अग्रवाल यांच्यावर गुन्हा दाखल करण्यात येऊन नियमानुसार कायदेशीर कारवाई करण्याची मागणी शाखा अभियंत्यांनी केली आहे.
काही दिवसांपूर्वीच पालिका आयुक्त रमेश पवार यांनी शहरात कुठेही रस्त्याचे अनधिकृतपणे खोदकाम होत असेल तर त्यांच्यावर गुन्हे दाखल करण्याचे आदेश दिले होते. त्यांच्या आदेशानंतर आता पालिकेला अनधिकृतपणे नैसर्गिक नाला बंद करणारे विकासक आढळून आल्याने त्यांच्यावर गुन्हा दाखल करण्यात आला आहे. शहरात अशाच पद्धतीने नैसर्गिक नाल्यामध्ये पाइप टाकून ते बुजवण्यात आले आहे. याचा पालिकेने तपास करण्याची आवश्यकता असल्याचे बोलले जात आहे.