पगडबंदलेनमधील जुन्या वाड्याला अचानक आग

नाशिक : वार्ताहर
जुने नाशिक भागातील पगडबंद लेन आंबेडकरवाडा येथील मागील बाजूला शनिवारी (दि.4) दुपारी दीड वाजेच्या सुमारास अचानक आग लागण्याची घटना घडली होती. स्थानिक नागरिकांनी त्वरित अग्निशमन दलाला पाचारण केल्यामुळे काही वेळात आग विझवण्यात यश मिळाले. दरम्यान, वाडा पडका व बंद असल्यामुळे जीवितहानी झाली नाही. तरी लाखो रुपयांचे नुकसान झाल्याचा प्राथमिक अंदाज आहे.
काल दुपारी दीड वाजेच्या सुमारास ही घटना घडली. या संपूर्ण परिसरात अनेक धोकादायक वाडे असून, सर्व वाडे रिकामे आहेत. घ.नं. 1468 पगडबंदलेन आंबेडकरवाडा मागे पडका वाडा आहे, त्या ठिकाणी लाकूड तसेच पालापाचोळा जमा झाला होता. अचानक त्याने पेट घेतला होता. लाकूड असल्यामुळे आगीने रौद्र रूप धारण केले होते. स्थानिक तरुणांनी प्रयत्न केले तर महापालिकेच्या अग्निशमन दलाला पाचारण करण्यात आले. महापालिकेचा एक बंब व काही सेवकांनी प्रयत्न करून आग विझवली. फायरमॅन जगदीश देशमुख, तोसिफ शेख, किशोर बागूल, अनिल गांगुर्डे, गणेश गायधनी आदींनी शर्थीचे प्रयत्न करून आग आटोक्यात आणली. याबाबत पोलिसांनी नोंद घेतली आहे.