मोहदरी घाटात बर्निंग कारचा थरार

मोहदरी घाटात बर्निंग कारचा थरार

नाशिक -पुणे महामार्गावर मोहदरी घाटाच्या पायथ्याला उभ्या असलेल्या कारने अचानक पेट घेतला. पेट्रोल आणण्यासाठी गेलेला कारचालक परत येईपर्यंत कार जळून खाक झाली होती. रविवारी (दि.11) मध्यरात्रीच्या सुमारास ही घटना घडली.
शुभम विलास चिटे (25, रा. शिवशक्ती हौसिंग सोसायटी, चंद्रेश्वर नगर, जुना सायखेडा रोड, जेलरोड, नाशिक रोड) याने याबाबत एमआयडीसी पोलिस ठाण्यात खबर दिली. चिटे हे टाटा टियागो कारने (एमएच. 15/एचजी 2297) बहिणीला घेण्यासाठी पुणे येथे गेलेला होता. तेथून परतत असताना मोहदरी घाटाच्या पायथ्याला हॉटेल कृष्णासमोर त्यांची कार बंद पडली. पेट्रोल संपले असावे असे समजून शुभमने बहिणीला नातेवाईकांसोबत घरी पाठवले. त्यानंतर पेट्रोल घेण्यासाठी तो पेट्रोलपंपावकडे गेला.
पेट्रोल घेऊन परतला असता त्याला कार आगीच्या भक्ष्यस्थानी सापडलेली दिसली. त्यानंतर अग्निशमन दलाला पाचारण करण्यात आले. मात्र कार जळून खाक झाली होती.  आगीचे कारण समजू शकले नाही. एमआयडीसी पोलिस घटनेचा अधिक तपास करीत आहेत.