मिलरला अडकून दुचाकीस्वार ठार

मुकणे : प्रतिनिधी
नाशिक-मुंबई महामार्गाचे सहापदरीकरण करणार्‍या पाडळी देशमुखजवळील सीडीएस कंपनीबाहेर रस्त्यावर सिमेंट मिक्सिंग करणार्‍या मिलरने दुचाकीस्वाराला फरपटत नेले. यावेळी कमरेवरून चाक गेल्याने त्याचा जागीच मृत्यू झाला.
सविस्तर वृत्त असे की, महामार्गाचे सहापदरीकरणाचे काम करणार्‍या सीडीएस कंपनीत मटेरिअल घेऊन येणार्‍या मिलरने दुचाकीस्वार सोमनाथ गंगाराम खडके (वय 20, रा. पिंपळगाव भटाटा) यास फरपटत नेले. यावेळी कमरेवरून चाक गेल्याने तो जागीच ठार झाला.
वाघोबावाडीकडून महामार्गाकडे दुचाकीने (एमएच 15- सीबी 4628) सोमनाथ जात असताना मिलरला (एमएच 15-जेडब्ल्यू 1489) तो अडकला होता. या घटनेनंतर मिलरचालक व कंपनीतील कामगारांनी तेथून पळ काढला. मृत सोमनाथचे काका गोविंद हंबीर, नारायण हंबीर व मावसभाऊ सागर हंबीर यांनी मृताच्या कुटुंबाला मदत मिळत नाही तोपर्यंत मृतदेह उचलणार नाही, असा पवित्रा घेतल्याने काही काळ तणाव निर्माण झाला. वाडीवर्‍हे पोलीस ठाण्याचे निरीक्षक हेमंतकुमार भामरे यांनी मध्यस्थी करून वातावरण शांत केले. नरेंद्राचार्य संस्थानच्या रुग्णवाहिकेचे चालक निवृत्ती गुंड यांनी घटना समजताच घटनास्थळी जाऊन मृतदेह उत्तरीय तपासणीसाठी घोटी ग्रामीण रुग्णालयात दाखल केला.