स्थायीत भाजपचे ‘पूर्व’ला झुकते माप

महापौरांकडून सोळा सदस्यांची नियुक्ती; सभापती निवडीकडे लक्ष

नाशिक : प्रतिनिधी
महानगरपालिकेच्या तिजोरीच्या चाव्या हाती असलेल्या स्थायी समिती सदस्यपदी महापौर हिमगौरी आहेर-आडके यांनी सोळा नगरसेवकांची घोषणा केली. दरम्यान, या नियुक्तीत सर्वाधिक नऊ सदस्य भाजपच्या वाट्याला आले. यात पक्षाने पूर्व विधानसभेला झुकते माप दिल्याचे दिसून आले. याखालोखाल शिंदेसेना चार, उद्धवसेना दोन तर राष्ट्रवादीला एक सदस्य आहे.
नाशिक मनपाची सोमवारी (दि.16) महापौर हिमगौरी आहेर-आडके, उपमहापौर विलास शिंदे यांच्या उपस्थितीत महासभा झाली. यापूर्वी 6 फेब्रुवारी रोजी महापौर व उपमहापौर पदाची निवडणूक झाली. त्यानंतर सोमवारी स्थायी समिती सदस्यांची नियुक्ती करण्यात आली. दरम्यान, महापौर, उपमहापौर पदाच्या निवडणुकीच्याच दिवशी स्थायी सदस्यांच्या नियुक्तीचा कार्यक्रम होता. परंतु, सर्वपक्षीय गटनेत्यांकडून स्थायी सदस्यांची नावे प्राप्त न झाल्याने महासभेचे आयोजन सोमवारी करण्यात आले. स्थायी सदस्यांसाठी कोणाची वर्णी लागते, याकडे भाजपच्या नगरसेवकांचे लक्ष लागून होते. सोबतच शिंदेसेनेतही कोणाला संधी मिळेल, याकडे इच्छुकांच्या नजरा होत्या. मनसे शिंदेसेनेसोबत गेल्याने मयुरी पवार व राष्ट्रवादीकडून अपक्ष नगरसेवक मुकेश शहाणे यांना संधी मिळणार हे निश्चित होते. तर उद्धवसेनेकडून भारती ताजनपुरे व योगेश गाडेकर यांना संधी दिली जाणार असल्याचे निश्चित होते. परंतु, भाजप व शिंदेसेनेतील कोणत्या नगरसेवकांना संधी मिळेल, हे गुलदस्त्यात होते. सोमवारी नियुक्ती करून यावर पडदा टाकण्यात आला.

पक्षनिहाय स्थायी सदस्य
भाजप (9) सरिता सोनवणे, इंदुबाई खेताडे,
मच्छिंद्र सानप, जयश्री गायकवाड, माधुरी बोलकर, नितीन निगळ, पल्लवी गणोरे, दीपाली कुलकर्णी, आदिती पांडे
शिंदेसेना (04) किरण गामणे, राहुल दिवे, रंजना बोराडे, मयुरी पवार (मनसे)
राष्ट्रवादी (अजित पवार) (01) मुकेश शहाणे (अपक्ष)
उद्धवसेना (02) योगेश गाडेकर, भारती ताजनपुरे

प्रभागनिहाय सदस्यसंख्या
नाशिकरोड – 5      पंचवटी – 3
सिडको – 3           सातपूर – 2
पूर्व – 3                 पश्चिम – 0

BJP’s stance is leaning towards the ‘East’