भराडवाडीतील चौघांविरुद्ध गुन्हा
सिडको : प्रतिनिधी
बहिणीला मारहाण होत असल्याचे पाहून तिला वाचवण्यासाठी गेलेल्या भावावर धारदार विळ्याने वार केल्याची घटना पंचवटीतील भराडवाडी परिसरात घडली. याप्रकरणी पंचवटी पोलिस ठाण्यात चौघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी शरद प्रकाश चव्हाण (वय 45, रा. भराडवाडी, मच्छीबाजार, फुलेनगर, पेठ रोड, पंचवटी) यांची लहान बहीण लता शेळी घरी आणण्यासाठी गेली होती. त्यावेळी त्यांची मोठी बहीण उषा कैलास जाधव, तिचे पती कैलास लालू जाधव, मुलगा बंटी कैलास जाधव आणि प्रेम कैलास जाधव यांनी संगनमताने लता यांना हाताबुक्क्यांनी मारहाण केल्याचे फिर्यादीत नमूद आहे.
लता यांना वाचवण्यासाठी शरद चव्हाण गेले असता, उषा जाधव हिने कमरेला खोसलेला गवत कापण्याचा विळा काढून त्यांच्या दिशेने वार केला. हा वार शरद यांनी डाव्या हाताने अडविल्याने त्यांच्या मनगटावर खोल जखम झाली. त्यानंतर तेथून पळून जात असताना चौघांनी शिवीगाळ करून शरद चव्हाण यांच्यासह त्यांच्या कुटुंबीयांना जीवे ठार मारण्याची धमकी दिल्याचेही फिर्यादीत म्हटले आहे.
याप्रकरणी पंचवटी पोलिस ठाण्यात चौघांविरुद्ध गुन्हा दाखल करण्यात आला. पुढील तपास पंचवटी पोलिस करीत आहेत.
Brother attacked with sickle while trying to save sister