अंगणवाडीसेविका भरतीसाठी आवाहन

येवला : प्रतिनिधी
तालुक्यामध्ये एकात्मिक बाल विकास सेवा योजना प्रकल्प येवला-1 व येवला-2 या कार्यालयांतर्गत रिक्त असणारी अंगणवाडी सेविका व मदतनीस पदाची भरती प्रक्रिया होणार आहे. पात्र उमेदवारांनी या पदासाठी अर्ज करावेत, असे आवाहन येवला पंचायत समिती बाल विकास प्रकल्प अधिकारी श्रीमती वंदना शिंपी यांनी केले आहे.
अंगणवाडीसेविका, मदतनीस या पदासाठी किमान शैक्षणिक अर्हता बारावी उत्तीर्ण उमेदवार असावा, तसेच वय 18 ते 35 वर्षादरम्यान असून विधवांंसाठी कमाल वयोमर्यादा 40 वर्षे राहणार आहे. उमेदवार हा त्या महसुली गावाचा रहिवासी असावा. रहिवासी दाखला तहसीलदारांच्या सहीचा आवश्यक आहे. इच्छुक व पात्र गरजू महिला उमेदवारांनी 3 ते 16 जूनदरम्यान कार्यालयीन दिवशी आपले अर्ज सादर करावेत. येवला प्रकल्प-1 साठी अंगणवाडीसेविकांच्या देवळाणे, खामगाव, सत्यगाव, काळेवस्ती (सताळी) या चार जागा असून, मदतनीसाच्या निमगाव मढ, नांदेसर व कोटमगाव बुद्रुक या तीन जागा आहेत.
येवला प्रकल्प-2 साठी मदतनिसांच्या ठाणगाव व खैरगव्हाण येथे जागा आहेत. या रिक्त अंगणवाडीसेविका व मदतनीस पदासाठी भरती प्रक्रिया राबवली जाणार आहे. अधिक माहितीसाठी संबंधित ग्रामपंचायत कार्यालय तसेच पंचायत समितीच्या प्रकल्प कार्यालयात संपर्क साधावा, असे आवाहन श्रीमती शिंपी यांनी केले.