उड्डाणपुलावर कार दुभाजकावर आदळली, चालक जखमी

सिडको : विशेष प्रतिनिधी
नाशिक-मुंबई महामार्गावरील लेखानगर परिसरातील उड्डाणपुलावर बुधवारी सकाळी 12 वाजेच्या सुमारास गंभीर अपघात घडला. पावसामुळे रस्त्यावर साचलेल्या पाण्याचा अंदाज न आल्याने वाहनचालकाचे नियंत्रण सुटले आणि कार थेट दुभाजकावर व विद्युत पोलवर आदळली.
या अपघातात चालक जखमी झाला असून, कारचे मोठे नुकसान झाले आहे. सुदैवाने कोणतीही जीवितहानी झाली नाही. अपघात होताच परिसरात वाहतूक कोंडी निर्माण झाली होती. वाहनांच्या लांबच लांब रांगा लागल्याने नागरिकांना मोठ्या त्रासाला सामोरे जावे लागले.घटनेची माहिती मिळताच पोलिसांनी तत्काळ घटनास्थळी धाव घेतली. त्यांनी जखमी चालकाला रुग्णालयात हलवले आणि वाहने हटवून वाहतूक सुरळीत केली.
दरम्यान, उड्डाणपुलावर पावसाच्या पाण्याची निकृष्ट निचरा व्यवस्था आणि देखरेखीअभावी असे अपघात वारंवार घडत असल्याने नागरिकांतून नाराजी व्यक्त केली जात आहे. प्रशासनाने तत्काळ उपाययोजना करावी, अशी मागणी जोर धरत आहे.