छत्रपती शिवाजी महाराज सर्किट विशेष ट्रेनचा मुंबईत आज मुख्यमंत्र्यांच्या हस्ते शुभारंभ

मुंबई :
महाराष्ट्र शासन आणि भारतीय रेल्वे खानपान व पर्यटन महामंडळाने आपल्या ऐतिहासिक व सांस्कृतिक वारशाला उजाळा देण्यासाठी तसेच छत्रपती शिवाजी महाराज यांच्या जीवनगौरवाचा अनुभव देण्यासाठी एक विशेष पर्यटक ट्रेन छत्रपती शिवाजी महाराज सर्किटची घोषणा केली आहे. ही भारत गौरव टुरिस्ट ट्रेन आज(दि. 9 जून)पासून सुरू होत आहे. छत्रपती शिवाजी महाराज सर्किटअंतर्गत भारत गौरव ट्रेनला 9 जून रोजी सकाळी 6.00 वा. छत्रपती शिवाजी महाराज टर्मिनल, प्लॅटफॉर्म क्रमांक 18, मुंबई येथे हिरवा झेंडा दाखवून महाराष्ट्राचे मुख्यमंत्री देवेंद्र फडणवीस यांच्या हस्ते शुभारंभ होणार आहे.
या कार्यक्रमास उपमुख्यमंत्री एकनाथ शिंदे, उपमुख्यमंत्री अजित पवार, पर्यटनमंत्री शंभूराज देसाई व पर्यटन राज्यमंत्री इंद्रनील नाईक यांच्या प्रमुख उपस्थितीत पार पडणार आहे.
या पाच दिवसांच्या विशेष टूरमध्ये छत्रपती शिवाजी महाराज यांच्या जीवनाशी संबंधित महत्त्वाच्या ऐतिहासिक स्थळांना भेट, इतिहासावर आधारित कार्यक्रम आयोजित केले जाणार आहेत. तरी पर्यटकांनी याचा अनुभव घ्यावा, असे आवाहन पर्यटनमंत्री शंभूराज देसाई यांनी केले आहे. भारतीय रेल्वे विभाग आणि महाराष्ट्र पर्यटन विकास महामंडळ महाराष्ट्र शासनाशी समन्वय साधून, छत्रपती शिवाजी महाराज टर्मिनस, मुंबई येथे या गौरवशाली ट्रेनचे हे आगमन महाराष्ट्राच्या संस्कृतीचे भव्य दर्शन घडवणारे ठरेल. भारत गौरव ट्रेन ज्या-ज्या ठिकाणी पोहोचेल, त्या ठिकाणी असलेल्या पर्यटन स्थळांची सविस्तर माहिती पर्यटकांना देण्यात येणार आहे. दि. 9 जून 2025 पासून सुरू होणारी ट्रेन पूर्णत: आरक्षित झाली आहे. पर्यटकांची चांगली पसंती दिली आहे. ‘छत्रपती शिवाजी महाराजांचा जाज्वल्य इतिहासाच्या या सहलीमुळे महाराष्ट्राच्या पर्यटनाला एक वेगळा आयाम मिळणार आहे. या उत्साही यात्रेत सहभागी होऊन छत्रपती शिवाजी महाराजांच्या विचारांचा वसा उचलावा, आपल्या संस्कृतीचा अभिमान बाळगावा, आणि नव्या पिढीला या इतिहासाचे दर्शन घडवावे’, असे आवाहन महामंडळाचे व्यवस्थापकीय संचालक मनोजकुमार सूर्यवंशी यांनी केले आहे. या उपक्रमासाठी महामंडळाचे अधिकारी समन्वय आणि परिश्रम करत असून, छत्रपती शिवाजी महाराजांचे गड-किल्ले, महाराष्ट्राची समृद्ध परंपरा आणि लोकसंस्कृती सर्वांपर्यंत पोहोचविण्यासाठी महामंडळ सतत प्रयत्नशील आहे.