मनमाडच्या डमरे कॉलनीत धाडसी घरफोडी

व्यापार्‍याचे दीड किलो सोन्यासह आठ लाख लंपास

मनमाड : प्रतिनिधी
मनमाड येथील डमरे कॉलनीत व्यापार्‍याच्या घरी धाडसी घरफोडी झाली. या घटनेत चोरट्यांनी तब्बल दीड किलोपेक्षा जास्त सोने व 8 लाखांची रोकड लंपास केली. शहरात येत्या पंधरा दिवसांत ही तिसरी मोठी चोरी झाली आहे. पोलिसांनी चोरट्यांचा बंदोबस्त करावा, अशी मागणी होत आहे.
सविस्तर माहिती अशी की, मनमाड येथील कॅम्प भागातील डमरे कॉलनी परिसरात दरवाजे, खिडक्या बनविणारे व्यापारी
मुर्तुजा रस्सीवाला यांच्या बंगल्याच्या मागील बाजूच्या खिडकीचे गज कापून चोरट्यांनी ऐवज लंपास केला. ते बाहेरगावी गेले होते. याबाबत पोलिसांना व्यापारी मुर्तुजा यांनी दिलेल्या माहितीनंतर नाशिक येथील श्वानपथकाने घटनास्थळाची पाहणी केली. चोरट्यांनी बंगल्याच्या मागील बाजूच्या खिडकीचे गज कापून आत प्रवेश केला व त्यांच्या बेडरूममधील कपाटाचे दरवाजे तोडून एक किलो 600 ग्रॅम सोने आणि आठ लाखांची रोकड लंपास केली आहे. गेल्या पंधरा दिवसांत ही तिसरी चोरीची घटना घडल्याने चोरट्यांनी पोलिसांना एकप्रकारे आव्हानच दिले आहे.