रामकाल पथचा विकास; व्यावसायिकांचे संरक्षण

आमदार राहुल ढिकले यांच्या प्रयत्नांना यश, मुख्यमंत्र्यांच्या मध्यस्थीने पुनर्वसन

पंचवटी : प्रतिनिधी
आगामी सिंहस्थ कुंभमेळ्याच्या पार्श्वभूमीवर सुरू असलेल्या रामकाल पथ प्रकल्पातील विस्थापित दुकानदारांच्या रोजगाराचा प्रश्न नाशिक पूर्व विधानसभा मतदारसंघाचे आमदार राहुल ढिकले यांच्या मध्यस्थीनंतर मुख्यमंत्री देवेंद्र फडणवीस यांनी या समस्येची दखल घेत विस्थापित व्यावसायिकांना त्याच ठिकाणी सुसज्ज गाळे उपलब्ध करून देण्याचा निर्णय घेतला होता. ते गाळे आता अंतिम टप्प्यात आहेत. या निर्णयामुळे उघड्यावर पडलेल्या शेकडो कुटुंबांना मोठा दिलासा मिळाला असून, परिसरात समाधानाचे वातावरण आहे.
नाशिकमध्ये आगामी कुंभमेळ्यापूर्वी सुमारे 98 कोटी रुपये खर्चून रामकाल पथ प्रकल्पांतर्गत परिसराचा कायापालट करण्यात येत आहे. यात दोन किलोमीटर लांबीचा मार्ग, 90 दुकाने आणि 550 जुन्या वास्तूंचे सुशोभीकरण करण्याचे काम मुंबईच्या स्काय वे कंपनीमार्फत वेगाने सुरू आहे. मात्र, या विकासकामादरम्यान स्थानिक दुकानदारांची अतिक्रमित दुकाने हटवण्यात आली होती. यामुळे लहान-मोठे व्यवसाय करून उदरनिर्वाह करणार्‍या स्थानिक दुकानदारांवर आणि त्यांच्या कुटुंबांवर उपासमारीची वेळ आली होती.
आपली रोजीरोटी हिरावली गेल्याने त्रस्त झालेल्या स्थानिक व्यापार्‍यांनी आमदार राहुल ढिकले यांची भेट घेऊन सहानुभूतीपूर्वक पुनर्वसन करण्याची आणि त्याच परिसरात छोटे-मोठे गाळे मिळवून देण्याची मागणी केली होती. नागरिकांची ही व्यथा लक्षात घेऊन आमदार ढिकले यांनी तत्काळ मुख्यमंत्री देवेंद्र फडणवीस यांची भेट घेतली. रामकुंडावरील विकासकामांसोबतच स्थानिकांच्या रोजगाराचे रक्षण करणे तितकेच गरजेचे असल्याचे त्यांनी मुख्यमंत्र्यांच्या निदर्शनास आणून दिले. मुख्यमंत्र्यांनी यावर सकारात्मक निर्णय घेत व्यापार्‍यांसाठी सुसज्ज गाळे उपलब्ध करून देण्याचे निर्देश दिले.

Development of Ramkal Path; protection for business owners