घरगुती गॅस सिलिंडरच्या किमती भडकल्या

युद्धाचा परिणाम ः दरात 60 रुपयांची वाढ; नवे दर लागू

नवी दिल्ली :
सर्वसामान्यांच्या खिशाला पुन्हा एकदा कात्री लागली आहे. 7 मार्चपासून घरगुती आणि व्यावसायिक एलपीजी सिलिंडरच्या किमतीत मोठी वाढ करण्यात आली आहे. 14.2 किलोच्या घरगुती गॅस सिलिंडरच्या दरात 60 रुपयांची, तर 19 किलोच्या व्यावसायिक सिलिंडरच्या दरात 115 रुपयांची दरवाढ करण्यात आली आहे. एप्रिल 2025 नंतर पहिल्यांदाच गॅसच्या किमतीत इतकी मोठी वाढ झाली आहे.
गेल्या काही महिन्यांपासून स्थिर असलेल्या गॅसच्या किमती अचानक वाढल्याने गृहिणींचे बजेट कोलमडणार आहे. नवीन दर आजपासूनच लागू झाले आहेत. दिल्लीप्रमाणेच मुंबई, पुणे आणि इतर प्रमुख शहरांमध्येही किमतीत वाढ झाली आहे. स्थानिक टॅक्सनुसार ही किंमत थोडीफार वेगळी असू शकते. केवळ घरगुतीच नाही, तर 19 किलोच्या व्यावसायिक सिलिंडरच्या दरातही वाढ होण्याची शक्यता वर्तवण्यात येत आहे. हॉटेल व्यावसायिक आणि छोट्या खाद्य विक्रेत्यांना याचा मोठा फटका बसणार आहे. परिणामी बाहेरचे खाणेही महाग होऊ शकते. घरगुती एलपीजी सिलिंडरच्या किमतीत शेवटचा बदल 8 एप्रिल 2025 रोजी करण्यात आला होता, तेव्हा किंमत 50 रुपयांनी वाढवण्यात आली होती.

व्यावसायिक गॅस किमतीतही वाढ

सध्या देशात एलपीजी गॅसची तुटवड्याची परिस्थिती जाणवत आहे. याचा सर्वांत मोठा परिणाम हॉटेल उद्योगावर झाला आहे. कमर्शियल एलपीजी गॅसचे दर अचानक 150 ते 200 रुपयांनी वाढले आहेत. यामुळे हॉटेल व्यवसाय पुढे कसा चालवायचा, हा प्रश्न व्यवसायिकांसमोर आहे.

Domestic gas cylinder prices soar