चांदवड-निफाड मार्गावर दोन दुचाकींचा भीषण अपघात

दोन तरुणांचा मृत्यू, तीन गंभीर जखमी

चांदवड : वार्ताहर
चांदवड-निफाड मार्गावरील गणूर ते परसूलदरम्यान गुरुवार, दि. 29 जानेवारी रोजी दुपारी एक वाजेच्या सुमारास दोन दुचाकींची समोरासमोर जोरदार धडक होऊन भीषण अपघात झाला. या भीषण अपघातात दोन तरुणांचा जागीच मृत्यू झाला असून, अन्य तीन जण गंभीर जखमी झाले आहेत.
चांदवड-निफाड मार्गावर गणूर ते परसूलदरम्यान दुचाकी क्र. एम. एच. 15 जी. जी. 7624 आणि क्र. एम. एच. 15 के. डी. 3024 या दोन्ही दुचाकींची समोरासमोर झालेली धडक इतकी जोरदार होती की, दोन्ही वाहनांचा अक्षरशः चक्काचूर झाला. अपघाताचा आवाज होताच परिसरातील नागरिकांनी मदतीसाठी घटनास्थळी धाव घेतली. जखमींना तातडीने रुग्णवाहिकेने चांदवड येथील उपजिल्हा रुग्णालयात दाखल करण्यात आले. या अपघातात प्रसाद विनायक शिंदे (वय 22, रा. देवरगाव) आणि गणेश पंडू बरडे (वय 23, रा. आसरखेडे) या दोन तरुणांचा दुर्दैवी मृत्यू झाला.
तसेच संकेत अरुण ठाकरे (वय 21, रा. गणूर), अजिंक्य अण्णासाहेब शिंदे (वय 22, रा. देवरगाव) आणि बाळू सखाराम गोधडे (वय 21, रा. गोई, चांदवड) हे तीन तरुण गंभीर जखमी झाले आहेत. संकेत ठाकरे याला पुढील उपचारासाठी पिंपळगाव बसवंत येथे हलवण्यात आले असून, उर्वरित जखमींवर चांदवड येथील खासगी रुग्णालयात उपचार सुरू आहेत. जखमींची प्रकृती चिंताजनक असल्याचे समजते.
ऐन तारुण्यात दोन मुलांचा अपघाती मृत्यू झाल्याने देवरगाव आणि आसरखेडे परिसरात शोककळा पसरली आहे.

Fatal accident involving two bikes on Chandwad-Nifad road