प्लास्टिक, डेब्रिजप्रकरणी 41 लाखांचा दंड

शहर विद्रूप करणार्‍यांवर कारवाई, नागरिकांना सहकार्याचे आवाहन

नाशिक : प्रतिनिधी
शहरातील विविध भागांत ड्रेबिज बांधकाम साहित्य उघड्यावर टाकणार्‍यांसह कचरा टाकून परिसर अस्वच्च्छ करणार्‍यांना महापालिकेच्या घनकचरा विभागाने दणका देत 41 लाख 28 हजारांची दंडात्मक कारवाई केली आहे. मनपाचे पथक शहराच्या गस्तीवर असून, त्यांच्याकडून शहर विद्रूपीकरणास कारणीभूत असलेल्या व्यक्तींवर कारवाईचा बडगा उगारला आहे.
मनपाचे पथक विविध ठिकाणी फिरून नियमभंग करणार्‍यांवर थेट दंडात्मक कारवाई करीत आहे. जानेवारी 2026 ते 10 जुलै 2026 या कालावधीत अस्वच्छता, प्रतिबंधित प्लास्टिक वापर आणि सार्वजनिक ठिकाणी घाण करणार्‍यांविरोधात दंडात्मक कारवाई व्यापक केली जात आहे. सार्वजनिक ठिकाणी कचरा करून अस्वच्छता करणार्‍या 307 जणांवर कारवाई करत चार लाख 3 हजार 190 रुपयांचा दंड वसूल करण्यात आला. मोकळ्या भूखंडावर बांधकाम मलबा (डेब्रिज) टाकणार्‍यांवरही मनपाने कारवाई केली आहे. यात सर्व्हिस चार्जच्या माध्यमातून 50 प्रकरणांत 40 हजार 200 रुपये, तर दंडात्मक स्वरूपात 79 प्रकरणांत सहा लाख 39 हजार 700 रुपये वसूल करण्यात आले. शहरात प्रतिबंधित प्लास्टिक वापरणार्‍यांविरोधातही मोहीम राबविण्यात आली. प्लास्टिक वापराच्या 183 प्रकरणांमध्ये नऊ लाख 40 हजार रुपयांचा दंड आकारण्यात आला. पालापाचोळा, प्लास्टिक, रबर व इतर कचरा जाळणार्‍या 36 जणांवर कारवाई करून 91 हजारांंचा दंड वसूल करण्यात आला. याशिवाय सार्वजनिक ठिकाणी लघुशंका करणारे, जैववैद्यकीय कचर्‍याची योग्य विल्हेवाट न लावणारे आणि इतर नियमांचे उल्लंघन करणार्‍यांवरही कारवाई करण्यात आली आहे. शहर स्वच्छ ठेवण्यासाठी नागरिकांचा सहभाग महत्त्वाचा आहे. आठ हजार 751 प्रकरणांत कारवाई करण्यात आली. घनकचरा व्यवस्थापन नियमांचे उल्लंघन करणार्‍यांमध्ये घरगुती, तसेच व्यावसायिक आस्थापनांचा मोठा समावेश आहे. विलगीकरण न केलेला कचरा, तसेच ओला-सुका कचरा वेगवेगळ्या डब्यांमध्ये साठवून न दिल्याप्रकरणी चार हजार 67 प्रकरणांत कारवाई करून 14 लाख 88 हजार 500 रुपयांचा दंड वसूल केला आहे. घनकचरा व्यवस्थापन नियमांचा भंग केल्याप्रकरणीही मनपाने कारवाई करत तीन लाखांचा दंड ठोठावला आहे.

शहर विद्रूपीकरण करणार्‍यांवर दंडात्मक कारवाई केली जात आहे. उघड्यावर कचरा टाकणे, प्लास्टिक वापरणे आदींसह बांधकामाचा मलबा तसाच ठेवल्याप्रकरणी ही कारवाई केली जात आहे. नागरिकांनी कारवाई टाळण्यासाठी महापालिकेला सहकार्य करावे.
– डॉ. आवेश पलोड, संचालक, घनकचरा व्यवस्थापन, मनपा

Fine of ₹41 lakh imposed for plastic and debris-related violations.