कडधान्याने भरलेल्या धावत्या ट्रकला आग

ओझर : वार्ताहर
मुंबई- आग्रा राष्ट्रीय महामार्ग क्रमांक 3 वरील एचएएल उड्डाणपुलाजवळ (ओझर) कडधान्याने भरलेल्या धावत्या ट्रकला आग लागली. या घटनेत ट्रकचे केबिन व मागील टायर जळून मोठे नुकसान झाले. सुदैवाने कोणतीही जीवितहानी झाली नाही.
समजलेली माहिती अशी की, बुधवारी पहाटे पावणेपाचच्या सुमारास कडधान्याने भरलेला ट्रक (एमएच 18 बीझेड 6493) मालेगावकडून नाशिकच्या दिशेने जात असताना ट्रकच्या मागील टायरमधून अचानक धूर येऊ लागला. ही बाब चालक मोहम्मद अश्रफ अन्सारी (रा. धुळे) याच्या लक्षात आल्यानंतर प्रसंगावधान राखत ट्रक रस्त्याच्या कडेला घेतला. मात्र, काही क्षणातच ट्रकने पेट घेतला. आगीत ट्रकचे इंजिन केबिन व टायर जळाले. घटनेची माहिती मिळताच पिंपळगाव महामार्ग पोलीस केंद्र व ओझर पोलीस ठाण्याचे अधिकारी तत्काळ घटनास्थळी दाखल झाले. सहाय्यक पोलीस उपनिरीक्षक माळोदे यांच्यासह अंमलदार सानप, काकवीपुरे व टोंगारे यांनी परिस्थितीचा ताबा घेत महामार्गावरील वाहतूक तत्काळ सर्व्हिस रोडने वळवली.
दरम्यान, एचएएल व ओझर नगरपरिषदेच्या अग्निशमन दलाचे बंब तेथे दाखल झाले. त्यांनी तातडीने आग आटोक्यात आणली. ट्रक रस्त्याच्या बाजूला असल्यामुळे काही वेळेनंतर महामार्गावरील वाहतूक सुरळीत सुरू केली. घटनेत कोणतीही जीवितहानी झाली नसली तरी ट्रकचे मोठे नुकसान झाले आहे.

Fire breaks out in a moving truck loaded with pulses