गोकुळ गितेंनी घेतली आमदारकीची शपथ

नाशिक : प्रतिनिधी
नाशिक विधान परिषद निवडणुकीत विजय मिळवणारे गोकुळ गिते यांनी मंगळवारी (दि.23) आमदारपदाची शपथ घेतली. विधान परिषदेचे सभापती प्रा. राम शिंदे यांनी त्यांना पद व गोपनीयतेची शपथ दिली. शपथ घेण्यावेळी गिते यांच्या मातोश्री सुनीता गिते, पत्नी उज्ज्वला गिते, बंधू गणेश गिते यांच्या पत्नी नगरसेविका दीपाली गिते व समर्थक उपस्थित होते.
सोमवारी (दि. 22) लागलेल्या निवडणूक निकालात गिते यांनी महायुतीचे उमेदवार नरेंद्र दराडे यांचा पराभव केला. गिते विजयी होताच उपमुख्यमंत्री एकनाथ शिंदे यांनी त्यांचे विश्वासू मंत्री उदय सामंत यांना विशेष विमानाने नाशिकला पाठवत मुंबईला बोलावून घेतले. यावेळी दोघांमध्ये काही मुद्यांवर चर्चा झाली. त्यानंतर गिते शिंदेसेनेचे सहयोगी सदस्य म्हणून महायुतीत सहभागी झाले. राज्याचे पावसाळी अधिवेशन सुरू असून, निकालाच्या दुसर्‍याच दिवशी गिते यांच्यासह नवनिर्वाचित आमदारांनी शपथ घेतली.

महाजनांचा उल्लेख अन् सभागृह खळखळून हसले
गोकुळ गिते यांनी शपथ घेतल्यानंतर अखेरीस जय हिंद, जय महाराष्ट्र, जय शिवराय असे म्हटले. मात्र, त्याचवेळी बाजूला असलेल्या मंत्र्यांमधून ’जय गिरीश महाजन’, असे वक्तव्य केल्याने सभागृहातील सर्वच खळखळून हसले. त्याचवेळी तेथे उपस्थित मुख्यमंत्री देवेंद्र फडणवीस यांनीदेखील यावर मजेशीर प्रतिक्रिया देत, ’तुमचं काही केलं असेल तर सांगून द्या’, असे म्हणताच उपस्थितांमध्ये पुन्हा हशा पिकला.

Gokul Gite took the oath as an MLA.