सोन्याचे दागिने, रोकड महिलेला परत

दुर्गामाता मित्रमंडळाने जपली परंपरा

लासलगाव : वार्ताहर
सोन्याचे भाव दिवसेंदिवस गगनाला भिडत असताना रस्त्यावर सोन्याची मौल्यवान वस्तू सापडल्यास अनेकांच्या मनात मोह निर्माण होऊ शकतो. मात्र, आजही समाजात प्रामाणिकपणा आणि माणुसकी जपणारी माणसे हयात आहेत, याचा प्रत्यय लासलगाव येथे आला. दुर्गामाता मंदिर, गणेशनगर परिसरात सापडलेले सोन्याचे दागिने व रोख रक्कम संबंधित महिलेची ओळख पटवून तिला परत करत दुर्गामाता मित्रमंडळाच्या पदाधिकार्‍यांनी प्रामाणिकपणाचा एक आदर्श घालून दिला आहे.
दुर्गामाता मंदिराजवळील रस्त्यावर मनीषा विजय कुराडे यांचे सोन्याच्या दागिन्यांचे व रोख रकमेचे पाकीट हरवले होते. या पाकिटात सुमारे पाच ग्रॅम वजनाचे अंदाजे 70 हजार रुपये किमतीचे सोन्याचे दागिने आणि काही रोख रक्कम होती. ही वस्तू दुर्गामाता मित्रमंडळाचे पदाधिकारी सूरज पवार, किशोरी ढोबळे आणि वर्षा आव्हाड यांना सापडली. त्यांनी कोणताही लोभ किंवा मोह न बाळगता तत्काळ संबंधित महिलेचा शोध घेऊन तिच्या हरवलेल्या वस्तू सुरक्षितपणे तिच्या सुपूर्द केल्या. आपली मौल्यवान वस्तू आणि रोख रक्कम सुखरूप परत मिळाल्यामुळे मनीषा कुराडे यांना मोठा दिलासा मिळाला.

Gold jewelry and cash returned to the woman.