सुरगाण्याजवळ मालवाहतूक एसटी बस पुलाखाली कोसळली

सुरगाणा : प्रतिनिधी
तालुक्यातील बार्‍हे येथील शेंदरपाडा गावालगत असलेल्या पुलावर गुरुवारी मालवाहतूक करणारी एसटी बस रस्त्यावरून घसरून थेट पुलाखाली कोसळल्याची घटना घडली. या अपघातात बसचे मोठे नुकसान झाले असले, तरी सुदैवाने कोणतीही जीवितहानी झाली नाही.
मालवाहतूक करत असताना पुलावर चालकाचे नियंत्रण सुटल्याने ही बस रस्त्याच्या कडेला घसरून पुलाखाली गेली. अपघाताची माहिती मिळताच शेंदरपाडा परिसरातील ग्रामस्थांनी तातडीने मदतकार्य सुरू केले. बसमध्ये प्रवासी नसल्याने दुर्घटना टळली, तसेच चालकही सुरक्षित आहे. अपघातानंतर काही वेळ वाहतूक विस्कळीत झाली होती. क्रेनच्या सहाय्याने बस बाहेर काढण्याचे काम सुरू केले आहे. या पुलावर वारंवार अपघाताच्या घटना घडत असल्याने, प्रशासनाने पुलावर मजबूत संरक्षण कठडे, इशारा फलक आणि परावर्तक चिन्हे यांसारख्या आवश्यक सुरक्षात्मक उपाययोजना तातडीने कराव्यात, अशी मागणी स्थानिक नागरिकांनी केली आहे.

Goods-carrying ST bus plunges off bridge near Surgana.