होर्मुझ पुन्हा ठप्प होणार ट्रम्प यांच्याकडून नौदल नाकेबंदीची घोषणा

वॉशिंग्टन/तेहरान
अमेरिका आणि इराणमधील वाढत्या तणावादरम्यान, अमेरिकेने मंगळवारी इराणवर हवाई आणि क्षेपणास्त्र हल्ल्यांची एक मोठी मालिका सुरू केली आहे. अमेरिकेचे राष्ट्राध्यक्ष डोनाल्ड ट्रम्प यांनी इराणविरुद्ध ’नौदल नाकेबंदी’ (नेव्हल ब्लॉकेड) पुन्हा लागू करण्याची घोषणा केली आहे. यामुळे होर्मुझच्या सामुद्रधुनीतून सागरी वाहतूक पुन्हा ठप्प होण्याची भीती असल्याने मध्यपूर्वेतील युद्धजन्य परिस्थिती कमालीची चिघळली आहे. चालू वर्षाच्या एप्रिल महिन्यात झालेल्या युद्धविराम करारांनंतर या भागात एवढ्या मोठ्या प्रमाणावर लष्करी संघर्ष प्रथमच पाहायला मिळत आहे. या तीव्र संघर्षाच्या पार्श्वभूमीवरही, राष्ट्राध्यक्ष ट्रम्प यांनी इस्लामिक रिपब्लिक इराणसोबत नव्याने शांतता करार करणे अद्यापही शक्य असल्याचे म्हटले आहे.
अमेरिकेच्या या कारवाईला प्रत्युत्तर म्हणून इराणने प्रादेशिक देशांना आणि व्यापारी जहाजांना लक्ष्य करण्यास सुरुवात केली आहे. संयुक्त अरब अमिरातीच्या (युएई) हवाल्याने मिळालेल्या माहितीनुसार, इराणने मोक्याच्या सागरी मार्गावरून जाणार्‍या दोन जहाजांवर हल्ले केले असून, यामध्ये एका खलाशाचा मृत्यू झाला आहे. याच दरम्यान, ब्रिटनच्या सागरी सुरक्षा यंत्रणेने ओमानच्या किनारपट्टीजवळ आणि होर्मुझच्या सामुद्रधुनीतून प्रवास करणार्‍या आणखी एका तेलवाहू टँकरवर क्षेपणास्त्र हल्ला झाल्याचे वृत्त दिले आहे, ज्यामुळे आंतरराष्ट्रीय जलमार्गावरील मालवाहतुकीला मोठा धोका निर्माण झाला आहे.

इराणची क्षमता नष्ट करण्यासाठी विशेष मोहीम
अमेरिकन लष्कराने जारी केलेल्या अधिकृत निवेदनानुसार, आंतरराष्ट्रीय व्यापारी जहाजांवर हल्ले करण्याची इराणची क्षमता नष्ट करण्यासाठी ही विशेष मोहीम राबवण्यात आली. अमेरिकेच्या पाच तास चाललेल्या या लष्करी मोहिमेत इराणमधील बुशेहर आणि बंदर अब्बास या किनारी शहरांमधील महत्त्वाच्या तळांना अचूक लक्ष्य करण्यात आले. व्यावसायिक जहाजांच्या वाहतुकीचे रक्षण करणे आणि आंतरराष्ट्रीय समुद्रातील इराणची आक्रमकता मोडून काढणे, हाच या हवाई हल्ल्यांचा मुख्य उद्देश असल्याचे अमेरिकेने स्पष्ट केले आहे.

Hormuz set to be blocked again; Trump announces naval blockade.