कादवा नदीपात्रातून ट्रॅक्टरने अवैध वाळूउपसा

महसूल प्रशासनाच्या दुर्लक्षावर नागरिकांचा रोष

नाशिक : प्रतिनिधी
निफाड गावातील कादवा नदीच्या दुबई परिसरातील पात्रातून ट्रॅक्टरच्या सहाय्याने सर्रास अवैध वाळूउपसा सुरू असल्याचे चित्र दिसून येत आहे. दिवसाढवळ्या सुरू असलेल्या या प्रकाराकडे महसूल व पोलीस प्रशासन डोळेझाक करत असल्याचा आरोप शेतकरी व नागरिकांकडून केला जात आहे. उपशामुळे नदीपात्राची मोठ्या प्रमाणावर हानी होत आहे. पर्यावरणीय समतोल बिघडण्याची भीती व्यक्त होत आहे.
कादवा नदी परिसरातील अनेक ठिकाणी ट्रॅक्टर-ट्रॉलीद्वारे वाळूउपसा केला जात असल्याचे प्रत्यक्षदर्शींनी सांगितले. नदीपात्र खोलवर खोदल्यामुळे पाण्याचा प्रवाह बदलत असून, काठावरील शेतजमिनी धोक्यात येत आहेत. आगामी पावसाळ्यात पूरस्थिती निर्माण होण्याचीही शक्यता शेतकर्‍यांनी व्यक्त केली आहे. ही चोरीची वाळू वाहतूक करणारे ट्रॅक्टर गावातून व रहदारीच्या भागातून जोरात पळवतात. त्यामुळे पोलिस प्रशासन मोठ्या दुर्घटनेची वाट पाहतंय का असा प्रश्न नागरिकांना पडला आहे.
अवैध उपशामुळे शासनाचा महसूल बुडत असतानाच स्थानिकांना मात्र मोठा त्रास सहन करावा लागत आहे. “वारंवार तक्रारी करूनही कारवाई होत नाही. तक्रारदाराचे नाव संबंधितांना समजतेच कसे? या बाबींमुळे प्रशासनाची निष्क्रियता संशयास्पद आहे,” असा रोष ग्रामस्थांनी व्यक्त केला. काही नागरिकांनी तर प्रशासनाच्या दुर्लक्षामुळे अवैध वाळूमाफियांना मोकळे रान मिळाल्याचा आरोप केला आहे.
दरम्यान, याप्रकरणी संबंधित विभागाकडे विचारणा केली असता, “निवडणूक सुरू आहे, तक्रारींची दखल घेऊन तपास करण्यात येईल आणि दोषींवर नियमानुसार कारवाई केली जाईल,” असे आश्वासन दिले. मात्र, प्रत्यक्षात तातडीची ठोस कारवाई न झाल्यास आंदोलनाचा इशारा शेतकरी व नागरिकांनी दिला आहे. पर्यावरण रक्षणासाठी आणि कायद्याची अंमलबजावणी सुनिश्चित करण्यासाठी कादवा नदीपात्रातील अवैध वाळू उपशावर त्वरित कारवाई करण्याची जोरदार मागणी परिसरातून होत आहे.

Illegal sand mining by tractor from Kadwa riverbed