सातपूर औद्योगिक परिसरात अवैध वृक्षतोड; अज्ञातांविरोधात गुन्हा

सातपूर : प्रतिनिधी
सातपूर औद्योगिक वसाहतीतील भूखंड क्रमांक 19 येथे परवानगीशिवाय वृक्षतोड करून शासकीय मालमत्तेचे नुकसान केल्याप्रकरणी सातपूर पोलीस ठाण्यात अज्ञात व्यक्तींंविरोधात गुन्हा दाखल केला आहे.
याप्रकरणी जयवंत परशुराम पवार (वय 57, कार्यकारी अभियंता, महाराष्ट्र औद्योगिक विकास महामंडळ, नाशिक विभाग) यांनी फिर्याद दिली आहे. ते एमआयडीसीच्या नाशिक विभाग कार्यालयात कार्यरत आहेत.
पोलिसांनी दिलेल्या माहितीनुसार, 8 एप्रिल 2025 पासून ते आजपर्यंत सातपूर औद्योगिक क्षेत्रातील भूखंड क्रमांक 19 येथील 170 झाडांपैकी काही झाडांची अज्ञात व्यक्तींनी बेकायदेशीर तोड केली. संबंधितांनी वृक्ष प्राधिकरणाची कोणतीही परवानगी न घेता झाडे तोडून त्यांची वाहतूक केली. वृक्षसंवर्धनाला हानी पोहोचवत शासकीय मालमत्तेचे नुकसान केले आणि परिसराचे विद्रूपीकरण केल्याचे फिर्यादीत नमूद करण्यात आले आहे.
तोडण्यात आलेल्या झाडांचे लाकूड अज्ञात ठिकाणी नेऊन त्याची विल्हेवाट लावल्याचेही समोर आले आहे. याप्रकरणी भारतीय न्याय संहिता कलम 324, महाराष्ट्र (नागरी क्षेत्र) झाडांचे संरक्षण व जतन अधिनियम 1975 चे कलम 8 व 21, पर्यावरण संरक्षण कायदा 1986 चे कलम 15 तसेच सार्वजनिक मालमत्तेचे नुकसान प्रतिबंधक कायदा 1984 चे कलम 3 अन्वये गुन्हा दाखल करण्यात आला आहे.
दरम्यान, याप्रकरणी अद्याप कोणालाही अटक करण्यात आलेली नाही. पुढील तपास सातपूर पोलीस ठाण्याचे वरिष्ठ पोलीस निरीक्षक प्रकाश अहिरे यांच्या मार्गदर्शनाखाली सातपूर पोलीस करीत आहेत.

Illegal tree felling in Satpur industrial area; Case registered against unknown persons