त्र्यंबकेश्वरसाठी गौतमी गोदावरीतून वाढीव पाणी

नाशिक : विशेष प्रतिनिधी
त्र्यंबकेश्वर व परिसराचा पाणीपुरवठा बळकट करण्यासाठी शासनाच्या जलसंपदा विभागाने अत्यंत महत्त्वाचा निर्णय घेतला आहे. महाराष्ट्र सुवर्ण नगरोत्थान महाअभियान कार्यक्रमांतर्गत नाशिक जिल्ह्यातील त्र्यंबकेश्वर तालुक्याच्या त्र्यंबक नगरपरिषदेसाठी गंगापूर धरण समूहाच्या गौतमी गोदावरी प्रकल्पातून वाढीव पाणी हक्क मंजूर करण्यात आला आहे.
शासनाने मंजूर केलेल्या नव्या कोट्यानुसार त्र्यंबक नगरपरिषदेच्या वाढीव पाणीपुरवठा योजनेसाठी अतिरिक्त पाण्याचा हक्क देण्यात आला आहे. गौतमी गोदावरी धरण जलाशयातून पिण्यासाठीचे 0.1279 दशलक्ष घनमीटर पाणी वाढीव मिळेल. वाणिज्यिक वापरासाठीचे 1.5792 दलघमी पाणी त्र्यंबकेश्वरला मिळेल.
पाण्याची गुणवत्ता : नागरिकांना पुरवण्यात येणारे पाणी पिण्यायोग्य करण्याची संपूर्ण जबाबदारी त्र्यंबक नगरपरिषदेची राहील.
कराराची पूर्तता : पाणीपट्टीची थकबाकी पूर्ण भरल्यानंतरच संबंधित संस्थेसोबत सुधारित नमुन्यानुसार पाणी वापराचा करारनामा केला जाईल. तसेच जलस्रोत प्रदूषित करणार्‍या वापरकर्त्यांवर दंडात्मक कारवाईचे नियमही लागू राहतील. यामुळे त्र्यंबकेश्वर शहराच्या पिण्याच्या आणि व्यावसायिक पाण्याच्या गरजेला मोठा दिलासा मिळणार आहे.

महत्त्वाच्या अटी-शर्ती
पाच वर्षांची मुदत : शासन निर्णयाच्या दिनांकापासून पुढील पाच वर्षांच्या आत नगरपरिषदेने या मंजूर आरक्षणातून प्रत्यक्ष पाणीउचल सुरू करणे बंधनकारक आहे. तसे न झाल्यास हे पाणी आरक्षण रद्द होईल.

जुने आरक्षण रद्द
या नवीन पाणी आरक्षण मंजुरीसोबतच 23 ऑक्टोबर 1997 च्या जुन्या शासन निर्णयानुसार ’आंबोली लघु- पाटबंधारे तलावातून’ मंजूर असलेले 0.73 दलघमी पाण्याचे आरक्षण अधिकृतपणे रद्द करण्यात आले आहे.

Increased water from Gautami Godavari for Trimbakeshwar

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.