पौष्टिक नाश्त्याची लज्जत न्यारी

नाशिक : प्रतिनिधी
दै. गांवकरी, दीप अप्लायन्स, गजानन एन्टरप्रायजेस आणि लायन्स क्लब यांच्या विशेष सहकार्याने जागतिक  महिला दिनानिमित्त आयोजित पाककला स्पर्धेला महिलांचा उत्स्फूर्त प्रतिसाद लाभला. एकाहून एक पदार्थांचे प्रकार पाहून उपस्थितही आश्‍चर्यचकित झाले.
गांवकरी भवनमध्ये काल झालेल्या या पाककला स्पर्धेत प्रथम क्रमांक पल्लवी खुटाडे, द्वितीय क्रमांक माधुरी तांदळे, तृतीय  क्रमांक स्नेहल कोठावदे यांना मिळाला.  विशेष म्हणजे स्पर्धेत सहभागी झालेल्या प्रत्येक स्पर्धकास सहभागाबद्दल बक्षीस देण्यात आले. यावेळी सावानाचे उपाध्यक्ष  वैद्य विक्रांत  जाधव, मनसे महिला आघाडीच्या जिल्हाध्यक्ष स्वागताताई उपासनी, दीप अप्लायन्सचे संचालक दीपक आहुजा, गजानन एन्टरप्रायजेसचे गणपत हडपे, परीक्षक ऍम्रो कॉलेजच्या प्राचार्या सुनंदा सोनी, नयना अमृतकर, मानसी सोमन, ब्रह्मकुमारी ईश्‍वरीय विश्‍वविद्यालयाच्या पुष्पादीदी, गांवकरीचे वृत्तसंपादक भागवत उदावंत, उपसंपादक देवयानी सोनार, उपसंपादक गोरख काळे, उपसंपादक अश्‍विनी पांडे, बाळासाहेब सोनावणे, नयना बारिया यांच्यासह मान्यवर उपस्थित होते. कार्यक्रमाचे प्रास्ताविक भागवत उदावंत यांनी तर सूत्रसंचालन के. के. अहिरे यांनी केले. कार्यक्रमाच्या यशस्वीतेसाठी वाहिद बागवान, समाधान रोकडे, गजानन वैद्य, पवन उदावंत यांनी परिश्रम घेतले.

स्तुत्य उपक्रम
महिला दिनाचे औचित्य साधत दैनिक गांवकरीने स्तुत्य उपक्रम राबविला. महिलांना आपल्यातील कलागुण सादर केले. महिला आज पुरुषांच्या बरोबरीने काम करते. कितीही जबाबदार्‍या आल्या तरी योग्य नियोजन करून पार पाडण्याचे कसब महिलांकडे आहे. घरातील गृहिणी असो वा जेट चालविणारी महिला सर्वांत आधी आपले घर कसे आरोग्यदायी राहील हा विचार प्रत्येक महिलेकडे असतो. त्यामुळे प्रत्येक महिला ही सुगरणच असते. आपल्या पदार्थांना नाव देऊन आपणच आपला ब्रँड द्यावा.आपल्या किंवा देशी नाव पदार्थाला दिल्यास वेगळा बॅ्रड तयार होईल.

उत्तम नियोजन
गांवकरीतर्फे आयोजित पाककला स्पर्धेत प्रथमच भाग घेतला. त्याहीपेक्षा दुसर्‍याने आपण नवीन पदार्थ केल्यावर मनापासून चवीनं हक्काने घेणे, टेस्ट म्हणून हे जास्त महत्त्वाचे आणि आनंदाचे वाटते. केल्याचे सार्थक आणि समाधान मिळते. सर्वांच्या घरी सर्व काही असते. पण पदार्थांची चव त्यामागे मनाची भावना आपुलकी, आपलापणा जाणवत होता. हे प्रत्येकात दिसून येत होते. गांवकरीने ठेवलेले नियोजन उत्तम होते. सर्व टीमचे मी मनापासून आभार आणि धन्यवाद देते.
– सारिका सोंनजे (स्पर्धक)

महिलांना अतिशय चांगला प्लॅटफॉर्म
गांवकरीच्या वतीने आयोजित स्पर्धेत भाग घेण्याचा माझा पहिला अनुभव पण अतिशय उत्तम होता आणि सगळ्यात महत्त्वाचं म्हणजे बर्‍याच ठिकाणी स्पर्धांमध्ये मी पण बघितलं की, जेव्हा प्राइस मिळतं तेव्हा ते आनंद होतोच, परंतु काही कारणाने जेव्हा प्राइज मिळत नाही तेव्हा खूप वाईट वाटते. परंतु गांवकरीने कुठल्याच गृहिणीला किंवा स्पर्धकाला नाराज होऊन पाठवलेलं नाहीये. सगळ्या जणींच्या चेहर्‍यावर आनंद होता. कारण आपण एखादा स्पर्धेत भाग घेतो तेव्हा त्यासाठी खूप मेहनत घेतलेली असते. मी स्वतः देखील चार दिवस आधीपासून माझ्या डोक्यात विचार सुरू होतात की, काय नवीन करता येईल, कशी आपली डिश छान वाटेल. प्रेझेंटेशन कसे छान असेल आणि इतकी सगळी मेहनत घेतल्यावर जेव्हा काही कारणामुळे बक्षीस मिळत नाही तेव्हा फार वाईट वाटते. परंतु गांवकरीने महिला दिनाच्या सप्ताह सर्व महिलांना अतिशय चांगला प्लॅटफॉर्म उपलब्ध करून दिला. सगळ्यांना आनंदी केलं, त्याबद्दल गांवकरी पूर्ण टीमचे मनःपूर्वक अभिनंदन आणि आभार मानते.
– वृषाली कावळे, स्पर्धक

प्रत्येकाला आनंद
स्पर्धेत भाग घेण्यासाठी उत्साह होता. बक्षीस मिळेल किंवा नाही हा भाग सेाडला तर कुटुंबासाठी नेहमी पौष्टिक आणि विविध प्रकार घरी आवर्जून करण्याचा प्रयत्न असतो.
स्पर्धेतील इतर सहभागींचेही पदार्थ जाणून घेता आले. दै. गांवकरीने व्यासपीठ उपलब्ध करून दिले, त्याशिवाय सहभागींनाही फुल ना ङ्गुलाची पाकळी भेटवस्तू मिळाल्याने आनंद द्विगुणित झाला. श्रमाचे चीज झाले.
– पूर्वा विसपुते, स्पर्धक