बेदमुथा कंपनीत बिबट्याची एन्ट्री

वन विभागाने ट्रँक्युलाइज करून घेतले ताब्यात

सिन्नर : प्रतिनिधी
मुसळगाव औद्योगिक सहकारी वसाहतीतील बेदमुथा इंडस्ट्रीजच्या आवारात बुधवारी सकाळी बिबट्या आढळल्याने कंपनी परिसरात काही काळ घबराट पसरली. बिबट्याची माहिती मिळताच वन विभागाचे पथक तातडीने दाखल झाले. बचाव पथकाने बिबट्याला ट्रँक्युलाइज करून सुरक्षितपणे ताब्यात घेतले. पकडलेली बिबट मादी असून, तिचे वय अंदाजे दीड ते दोन वर्षे आहे.
बुधवारी (दि. 12) सकाळी साडेदहाच्या सुमारास कंपनीच्या आवारात बिबट्या असल्याची माहिती वन विभागाला मिळाली. वनपरिक्षेत्र अधिकारी हर्षल पारेकर यांच्या मार्गदर्शनाखाली वनपाल तानाजी भुजबळ, वनरक्षक आकाश रुपवते, वनरक्षक संतोष चव्हाण तसेच वन्यजीव बचाव पथकाचे मधुकर शिंदे, रोहित लोणारे आणि निखिल वैद्य घटनास्थळी पोहोचले.
वन विभागाच्या पथकाने कंपनी कर्मचार्‍यांच्या मदतीने बिबट्याचा शोध घेतला. योग्य खबरदारी घेत वन्यजीव बचाव पथकाने बिबट्याला ट्रँक्युलाइज केले. त्यानंतर त्याला सुरक्षितपणे ताब्यात घेऊन पुढील कार्यवाहीसाठी मोहदरी वनोद्यानात नेण्यात आले. या कारवाईदरम्यान बेदमुथा कंपनीचे महेश सूर्यवंशी आणि एकनाथ हारक यांनी वन विभागाच्या पथकाला सहकार्य केले.

Leopard enters Bedmutha company