दोन लाखांची लाच घेताना महावितरण अधिकारी जाळ्यात

नाशिक : प्रतिनिधी
बिलांमध्ये त्रुटी न काढता प्रलंबित बिल मंजूर करण्यासाठी दोन लाख रुपयांची लाच स्वीकारताना महावितरण कंपनीच्या दोघा अधिकार्‍यांना लाच लुचपत प्रतिबंधक विभागाच्या अधिकार्‍यांनी रंगेहाथ पकडले.  अमर अशोक खोंडे, व्यवस्थापक वित्त व लेखा विभाग महावितरण कंपनी धुळे आणि मनोज अरुण पगार उप व्यवस्थापक अशी या दोघा लाचखोर अधिकार्‍यांची नावे आहेत.
तक्रारदार हे शासकीय नोंदणीकृत ठेकेदार आहेत. त्यांचे मंहावितरण कंपनीकडे 2018-19  या वर्षात 56,31, 590 रुपयांचे काम पूर्ण केले होते.  त्या कामाच्या सादर केलेल्या बिलात त्रुटी न काढता प्रलंबित बिल मंजूर करण्याच्या मोबदल्यात  दोन्ही अधिकार्‍यांनी पाच लाख रुपयांची लाच मागीतली होती. तडजोडीअंती अडीच लाख रुपये देण्याचे ठरले.पहिला हफ्ता  दोन लाख रुपये स्वीकारताना पथकाने रंगेहाथ पकडले.
लाच लुचपत प्रतिबंधक विभागाच्या अधीक्षक शर्मिष्ठा वालावलकर- घारगे, अपर अधीक्षक नारायण न्याहाळदे, उपअधीक्षक नरेंद्र पवार, अनिल बडगुजर यांच्या मार्गदर्शनाखाली पोलीस निरीक्षक प्रकाश झोडगे, शरद काटके, संतोष पावरा, भूषण खलाणेकर, भूषण शेटे, गायत्री पाटील, सुधीर मोरे,  रामदार बारेला,  मकरंद पाटील, प्रशांत बागूल, रोहिणी पवार, वनश्री बोरसे यांनी ही कारवाई केली.