तिचं असणं…!

तिचं असणं…!

राखी खटोड

तिच्या असण्याने येतो जीवनाला अर्थ ,
तिचं नसणं म्हणजे जीवनच व्यर्थ !
चार भिंतीच्या घराला तिच्या असण्याने येत घरपण,
घरातल्या खुशालीचा तीच असते दर्पण…
होळी असो की दिवाळी,
अंगणी असते सडा रांगोळी…
तिच्या आनंदी असण्याने
प्रत्येक सण साजरा होई .
तिचं विश्व म्हणजे फक्त तिचं कुटुंब ,
मनामध्ये प्रेम आणि माया असते तुडुंब…
सर्वांची आवड – निवड तिला असते ठाऊक,
प्रेमाचा व्यवहार तिचा असतो घाऊक..
आपल्या पिलांना ती जीवापाड जपते,
त्यांच्या स्वप्नपूर्तीसाठी ती वाट्टेल ते करते…
आवभगत पाहुणे मंडळींचा करते मनापासून,
काम कोणतेही असो , तयार असते कंबर कसून…
जोडीदाराला असते हिची जन्मोजन्मीची साथ,
त्या साथीच्या बळावर करतात अनेक अडचणींवर मात…
प्रत्येक रूपात भासते तिची प्रेमाची सावली,
जीव ओवाळून टाकावा अशी ती माऊली…
तिच्या प्रसन्न असण्याने वास्तूत लक्ष्मी करेल वास,
सौख्य आणि आनंदाचे हे गुपित आहे खास…
नाही ती शोभेची वस्तू न व्हावा तिचा अनादर,
सत्कार नको तिला ,फक्त द्या प्रेमरूपी आदर…
ती आनंदी -सुखी संसाराचा मार्ग,
ती समाधानी तर घर बनेल स्वर्ग..