विहितगांवचा मथुरा चौक ठरतोय डेंजरझोन

विहितगाव ते पाथर्डी या हा अती वर्दळीचा मार्ग आहे. याशिवाय अनेकजण शॉर्टकट म्हणून या रस्त्याने ये जा करतात. मात्र अनेक अवजड वाहनांचा वेग खूपच असतो त्यांच्या वर कुठलेही नियंत्रण नाही. तसेच इतरही छोटे वाहनधारक आणि काही दुचाकी स्वारांचा वेग खूपच असतो. त्यामुळे या मार्गावर अनेकदा अपघात होत आहे. विशेष म्हणजे या मार्गावर कुठेही गतिरोधक व दुभाजक नाहीत. त्यामुळे अतिवेगात येणाऱ्या वाहनांची समोरासमोर धडक होऊन अनेकांचा मृत्यू झाला आहे. दोन महिन्यापूर्वी केंद्रीय विद्यालयाचा विद्यार्थी याच ठिकाणी अपघातात मृत झाला होता. किरकोळ अपघात होऊनबऱ्याच जणांना अपंगत्वही आले आहे. या मार्गाने शाळकरी मुले, शेतकरी, कामगार, यांसह विहितगाव येथील विठ्ठल मंदिरात भाविक दर्शनासाठी पायी येत असतात. त्यातच हा रस्ता रुंद असल्याने तो ओलांडणे कठीण होऊन जाते. त्यामुळे मथुरा चौकात चारही दिशांनी येणाऱ्या रस्त्यावर १० मीटर अगोदर गतिरोधक बसविण्यात यावेत, अशी मागणी सामाजिक कार्यकर्त्या माधुरी ओहळ, सुधाकर ओहळ, संजय कोठुळे, ज्ञानेश्वर कोठुळे, मंगेश हांडोरे यांनी केली आहे. खूप दिवसांपासून प्रलंबित असलेली जनतेची ही समस्या महानगरपालिका प्रशासनाने लवकरात लवकर दूर करावी; अन्यथा आंदोलन करण्याचा इशारा या सामाजिक कार्यकर्त्यांनी दिला आहे.