मंत्री गडकरींकडून द्वारका रस्ते प्रकल्प मंजूर

नाशिक : प्रतिनिधी
सिंहस्थापूर्वी द्वारका-नाशिकरोड महामार्ग रस्त्याच्या 221.51 कोटींच्या निधीसह कामाची घोषणा खुद्द केंद्रीय रस्ते वाहतूक आणि वाहतूक महामार्ग मंत्री नितीन गडकरी यांनी केली आहे. मंगळवारी (दि.26) मंत्री गडकरी यांनी त्यांच्या सोशल माध्यमाद्वारे याबाबतची पोस्ट टाकत माहिती दिली.
मागील महिन्यात महापौर हिमगौरी आहेर-आडके, स्थायी समिती सभापती मच्छिंद्र सानप यांनी नागपूर येथे केंद्रीय मंत्री नितीन गडकरी यांची नागपूर येथे भेट घेत द्वारका ते दत्त मंदिर चौक या रस्त्याच्या कामाला व निधीला मंजुरी देण्याचे साकडे घातले होते. त्यानंतर खर्‍या अर्थाने या रस्त्याच्या कामाला चालना मिळाली होती. राष्ट्रीय महामार्ग 60 वरील द्वारका ते नाशिकरोड या सुमारे साडेसहा किमीच्या रस्त्यावरून प्रचंड प्रमाणात वाहतूक होत असते. तसेच सिंहस्थाच्या अनुषंगाने तर या रस्त्यावरून अनेक पटीने वाहतूक होणार असल्याने रस्ता रुंदीकरणाचा निर्णय महापालिका तसेच राष्ट्रीय महामार्ग प्राधिकरणाने घेतला होता. त्यानुसार आता या रस्त्याचे काम महापालिकेच्या माध्यमातून हाती घेतले जाणार असून, आता तर केंद्रीय मंत्री नितीन गडकरी यांनीच आपल्या सोशल माध्यमातून त्याबाबतची घोषणा केल्याने महापालिकेला मोठा दिलासा मिळाला आहे. सिंहस्थ कामांनादेखील विधान परिषद निवडणुकीच्या आचारसंहितेतून वगळण्यात आल्याने या रस्त्याच्या कामाचाही मार्ग खुला झाला आहे.
महापालिकेने द्वारका ते दत्त मंदिर चौक या रस्त्याच्या कामासाठी निविदा प्रक्रिया हाती घेतली असून, गेल्या आठवड्यात त्याबाबत संबंधित सहभागी होणार्‍या ठेकेदारांची निविदापूर्व बैठक पार पडली आहे. पंधरा दिवसांपूर्वी मनपा आयुक्तांनी दिल्ली दौर्‍यात या रस्त्याच्या कामाचा पाठपुरावा करत निधी मंजुरीची भेट नाशिककरांना दिली होती. त्यानंतर आता स्वत: मंत्री गडकरी यांनी याबाबतची माहिती त्यांच्या सोशल माध्यमाद्वारे दिली आहे.

Minister Gadkari approves Dwarka road project