मनसेचे मनपा मुख्यालयात झोपून आंदोलन

नाशिक : प्रतिनिधी
शहरातील रस्त्यांची अत्यंत दयनीय अवस्था, ठिकठिकाणी पडलेले जीवघेणे खड्डे आणि त्यातून होत असलेल्या अपघातांमध्ये निष्पाप नागरिकांचा बळी जात असल्याच्या निषेधार्थ महाराष्ट्र नवनिर्माण सेनेच्या वतीने शुक्रवारी नाशिक महानगरपालिका मुख्यालयात झोपून आंदोलन करण्यात आले. सार्वजनिक बांधकाम विभाग तसेच आयुक्त कार्यालयासमोर झालेल्या या आंदोलनातून मनपा प्रशासनाच्या निष्क्रिय कारभाराविरोधात तीव्र संताप व्यक्त करण्यात आला.
मनसे अध्यक्ष राज ठाकरे आणि मनसे नेते अमित ठाकरे यांच्या आदेशानुसार तसेच नाशिक जिल्हा संपर्क अध्यक्ष अविनाश जाधव आणि अभिजित पानसे यांच्या मार्गदर्शनाखाली हे आंदोलन करण्यात आले. शहरातील रस्त्यांची बकाल अवस्था, वाढते खड्डे आणि त्याकडे प्रशासनाचे होत असलेले दुर्लक्ष यामुळे सामान्य नागरिकांच्या जीवाशी खेळ सुरू असल्याचा आरोप मनसेने केला. यावेळी कुंभमेळामंत्री गिरीश महाजन यांच्या आढावा बैठकीदरम्यान मनसेच्या पदाधिकार्‍यांनी त्यांना घेराव घालून रस्त्यांच्या प्रश्नावर जाब विचारला. रस्ते तातडीने खड्डेमुक्त न केल्यास महानगरपालिकेच्या कोणत्याही अधिकार्‍याला रस्त्यावर फिरू देणार नाही, असा इशारा दिला.
आंदोलनात जिल्हाध्यक्ष अंकुश पवार, शहराध्यक्ष सुदाम कोंबडे, संदीप भवर, जिल्हा उपाध्यक्ष मनोज घोडके, विद्यार्थी सेना जिल्हाध्यक्ष ललित वाघ, शहराध्यक्ष तुषार जगताप, पंचवटी विभाग अध्यक्ष विजय पडोळ, राहुल पाटील, शहर संघटक मेघराज नवले, अमित गांगुर्डे, प्रफुल बनबैरू, किरण क्षीरसागर, विराज आंबेकर, नागेश काठोळे, कुणाल पाटील, मयूर जैन, दीपक येलमामे, गणेश शेजुळ, आतिश कापडणीस, मिरज भालेराव, किसान साळुंखे यांच्यासह महाराष्ट्र सैनिक उपस्थित होते.

MNS stages protest by lying down at the municipal corporation headquarters.