मालवाहू ट्रकच्या धडकेत नाशिकचे पती-पत्नी ठार

विंचूर-प्रकाशा महामार्गावर अपघात

देवळा : प्रतिनिधी
येथील विंचूर-प्रकाशा राष्ट्रीय महामार्गावर रामेश्वर फाट्याजवळील आशादीप मंगल कार्यालयासमोर सोमवार (दि. 22) सायंकाळी पाचच्या सुमारास मालवाहू ट्रक आणि मोटारसायकल यांच्यात भीषण अपघात झाला. या अपघातात दुचाकीवरील पती-पत्नी जागीच ठार झाले. बाबुलाल रमेश गरुड (वय 46) व वैशाली बाबुलाल गरुड (वय 42) (मूळ रा. सटाणा, सध्या रा. नाशिक) अशी मृत पती-पत्नीची नावे आहेत.
देवळा पोलिसांनी दिलेल्या माहितीनुसार, गरुड पती-पत्नी सोमवारी सायंकाळी पाचच्या सुमारास मोटारसायकलने (एमएच 41 बीसी 6063) जात असताना, रामेश्वर फाट्यानजीक मालवाहू गाडीने (एमएच 18 बीझेड 2735) त्यांच्या दुचाकीला जोरदार धडक दिली. ही धडक इतकी भीषण होती की, दुचाकीस्वार बाबुलाल गरुड यांचा अतिरक्तस्रावामुळे, तर वैशाली गरुड यांच्या डोक्याला गंभीर दुखापत झाल्याने दोघांचाही घटनास्थळीच मृत्यू झाला.
अपघाताची माहिती मिळताच देवळा पोलीस ठाण्याच्या सहाय्यक पोलीस निरीक्षक नंदा पाटील, पोलीस कॉन्स्टेबल दिलीप सोनवणे आणि श्रावण शिंदे यांनी तातडीने घटनास्थळी धाव घेत पंचनामा केला. दोन्ही मृतदेह विच्छेदनासाठी देवळा ग्रामीण रुग्णालयात पाठवण्यात आले आहेत.
या घटनेप्रकरणी देवळा पोलीस ठाण्यात गुन्हा दाखल करण्यात आला आहे. सहाय्यक पोलीस निरीक्षक नंदा पाटील यांच्या मार्गदर्शनाखाली पोलीस तपास करत आहेत.

Nashik couple killed in cargo truck collision

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.