नाशिककरांना अद्याप दोन हजार खड्ड्यांचा त्रास !

चार हजार खड्डे बुजविल्याचा दावा; 15 जूनची डेडलाइन

नाशिक : प्रतिनिधी
महापालिकेच्या बांधकाम विभागाकडून खड्डे बुजविण्याची कामे सहाही विभागात सुरू आहेत. आतपर्यत चार हजार खड्डे बुजवल्याचा दावा बांधकामने केला आहे. मात्र, अद्याप दोन हजार 297 खड्डे बुजविण्याचे काम सुरू असल्याचे बांधकाम विभागाने म्हटले आहे.

सहाही विभागात एकूण सहा हजार 797 खड्डे आहेत. पावसापूर्वीच शहरातील सिडको, नाशिक पूर्व, नाशिक पश्चिम विभाग, नाशिकरोड, पंचवटीसह नाशिकरोड परिसरातील रस्त्यांवर खड्ड्यांचे साम्राज्य झाले. त्यामुळे या रस्त्यातून प्रवास करतांना नागरिकांना अनेक अडचणींना सामोरे जावे लागते. त्यामुळे अनेक ठिकाणी किरकोळ अपघाताचे प्रकारही घडले आहेत. कॉलनी रस्ते, मुख्य रस्त्यांवरील डांबरीकरण व सिमेंट रस्त्यांचेही नुकसान झाले. शहरातील खड्डे दुरुस्तीसाठी कोटयावधीची तरतूद अंदाजपत्रकात केली जाते. महापालिका दरवर्षी या तरतुदीतील निधीचा उपयोग रस्ते दुरुस्तीवर करत असते. मात्र पावसाळ्यात दर्जाहीनकामामुळे खड्यांचे साम्राज्य शहरभर दिसून येते. पावसाळ्यात डांबरीकरणाचे काम शक्य नसल्याने माती मुरूम टाकून मलमपट्टी केली जाते. परंतु काही दिवसांतच खड्ड्यातून माती, मुरुम वाहून जाऊन खड्याचा प्रश्न पुन्हा जैसे थे होत असल्याचे दिसून येते. सध्या शहरातील वेगवेगळ्या भागात रस्त्याची दुरुस्ती व्हावी अशा मागण्या मनपाकडे येत आहेत. त्या पार्श्वभूमीवर मनपाकडून विविध भागांतील रस्ते काम सुरू करण्यात आले आहे. शहरात काही दिवसांपूर्वी झालेल्या अवकाळी पावसामुळे अनेक ठिकाणी खड्डे पडले. त्यामुळे मनपाकडे खड्ड्यांबाबत अनेक तक्रारी प्राप्त झाल्या होत्या. त्यानुसार खड्डे बुजविण्याचे काम सुरू आहे.

शहरात अवकाळी पावसामुळे खड्डे पडले होते. ते तातडीने दुरुस्त केले जात आहेत. सहा विभागांतील अभियंत्यांना खड्डे बुजविण्याचे आदेश दिले असून, लवकरच सर्व खड्डे बुजविले जातील.
– संजय अग्रवाल, शहर अभियंता, मनपा

विभागाचे नाव बुजविलेले खड्डे अपूर्ण खड्डे
नाशिकरोड 807 239
सातपूर 78 533
सिडको 1432 1126
नाशिक पूर्व 41 49
नाशिक पश्चिम 62 74
पंचवटी 2080 276
एकूण 4500 2297