मोटारसायकल चोरीतील नेपाळी चोरटा अटकेत

आडगाव पोलीस ठाण्याच्या गुन्हे शोध पथकाची यशस्वी कामगिरी

पंचवटी : प्रतिनिधी
तपोवनातील लक्ष्मण मंदिर परिसरातून चोरीला गेलेल्या मोटारसायकलचा अवघ्या 24 तासांत छडा लावण्यात आडगाव पोलिसांना यश आले आहे. यात नवीनपुन तुररामपुन मगर (21, रा. के. के. वाघ कॉलेजचे मागे, आडगाव) यास अटक करण्यात आली असून, त्याच्याकडून चोरीच्या पाच मोटारसायकली हस्तगत करण्यात आल्या आहेत. आरोपी हा मूळचा नेपाळमधील चौजारी (रूखुम) येथील आहे.
रामानंददास गुरुलक्ष्मणदास बैरागी (25, रा. श्री साक्षीगोपाल मंदिर, तपोवन) यांची मोटारसायकल 15 फेब्रुवारीस हॅन्डल लॉक असताना चोरीला गेली होती. त्यांनी याबाबत आडगाव पोलिसांकडे तक्रार करताच गुन्हे शाखेने तपासास प्रारंभ केला. हवालदार दादासाहेब वाघ व सुमित शिंदे हे वाहनाचा शोध घेत असताना त्यांना एक युवक चोरीचे वाहन घेऊन पार्कसाइट समोरील रस्त्यावरून घेऊन जात आहे, अशी माहिती मिळाली. त्यानुसार, पथकाने तिथे जाऊन आरोपीस ताब्यात घेतले. त्यास पोलीस ठाण्यात आणून सखोल चौकशी केली असता मोटारसायकल चोरीच्या घटनांची कबुली दिली. त्याने दडवून ठेवलेल्या हिरो एचएफ डिलक्स (एमएच 15 एचएल 0179), हिरो पॅशन प्रो (एमएच 15 सीवाय 9395), होंडा मोपेड (एमएच 15 डीपी 1387), बजाज मोटारसायकल (एमएच 15 बीटी 3025), हिरो होंडा मोटारसायकल (एमएच 15 एझेड 7-8 नंबर खोडलेला) व काही मोटारसायकलींच्या चाव्या हस्तगत करण्यात आल्या आहेत.
वरिष्ठ पोलीस निरीक्षक उमेश पाटील यांच्या मार्गदर्शनाखाली गुन्हे शोध पथकाचे उपनिरीक्षक पंचमुख, हवालदार दादासाहेब वाघ, इम्रान शेख, परदेशी, काटकर, आव्हाड, सुमित शिंदे, शक्ती पेंढारकर, अक्षय गोसावी, रवींद्र लिलके, दीपक भुजबळ, श्रीमती बच्छाव यांनी ही कामगिरी बजावली.

Nepali thief arrested for stealing a motorcycle