निदा खानची नाशिक कारागृहात रवानगी

14 दिवसांची न्यायालयीन कोठडी

नाशिकरोड : विशेष प्रतिनिधी
टीसीएसमधील बहुचर्चित लैंगिक अत्याचार आणि धर्मांतर प्रकरणातील संशयित आरोपी निदा खान हिचा पोलीस कोठडीतील मुक्काम संपला आहे. तब्बल दोन महिना पोलिसांना गुंगारा देणार्‍या गर्भवती निदा खानला नाशिकरोड न्यायालयाने 14 दिवसांची न्यायालयीन कोठडी सुनावली आहे. तिची रवानगी आता नाशिकरोड मध्यवर्ती कारागृहात करण्यात आली आहे.
चार दिवसांची पोलीस कोठडी संपल्यानंतर निदा खानला सोमवारी (दि. 11) अतिरिक्त जिल्हा व सत्र न्यायाधीश केदार जोशी यांच्या न्यायालयात हजर करण्यात आले. यावेळी न्यायालयाबाहेर कडक पोलीस बंदोबस्त तैनात करण्यात आला होता.
निदा खान हिच्यावर असलेल्या गंभीर आरोपांच्या पार्श्वभूमीवर सरकारी पक्ष आणि बचावपक्षात जोरदार युक्तीवाद झाला होता. पोलीस कोठडीदरम्यान निदा आणि तिच्या कुटुंबातील सदस्यांची समोरासमोर बसवून चौकशी करण्यात आली होती. या तपासात काही महत्त्वाचे दुवे हाती लागल्याचे समजते. निदा खानच्या वतीने अ‍ॅड. राहुल कासलीवाल यांनी काम पाहिले.
गेल्या चार दिवसांच्या कोठडीत पोलिसांनी निदा खानकडून गुन्ह्याशी संबंधित माहिती काढून घेण्याचा प्रयत्न केला. फरार असताना तिला कोणी आश्रय दिला आणि धर्मांतर प्रकरणाचे धागेदोरे कोठे जोडलेले आहेत, यावर पोलिसांनी लक्ष केंद्रित केले होते. कुटुंबातील सदस्यांसोबत समोरासमोर चौकशी करून पोलिसांनी अनेक विसंगती दूर केल्याचा दावा केला आहे.
संशयित निदा खान गर्भवती असल्याने तिच्या आरोग्याची आणि सुरक्षेची काळजी घेण्याचे निर्देशही संबंधित यंत्रणेला देण्यात आले आहेत. न्यायालयाने पोलीस कोठडी वाढवून न दिल्याने तिची रवानगी न्यायालयीन कोठडीत झाली आहे. पुढील किमान 14 दिवस आता तिला नाशिकरोड मध्यवर्ती कारागृहातील काढावे लागणार आहेत.

Nida Khan sent to Nashik jail