महाशिवरात्रीनिमित्त लाखोंनी घेतला स्नान-दर्शनाचा लाभ
घोटी : प्रतिनिधी
महाशिवरात्रीच्या पावन पर्वानिमित्त इगतपुरी तालुक्यातील सर्वतीर्थ टाकेद व श्रीक्षेत्र कावनई येथे भाविकांची अभूतपूर्व गर्दी उसळली होती. ‘हर हर महादेव’ व ‘बम बम भोले’च्या जयघोषाने दोन्ही तीर्थक्षेत्रांचा परिसर दिवसभर दुमदुमून गेला. टाकेद येथे एक लाखाहून अधिक भाविकांनी स्नान व दर्शनाचा लाभ घेतला, तर कावनई येथे सुमारे 80 ते 90 हजार भाविक उपस्थित होते. दिवसभर गर्दीचा ओघ कायम राहून रात्री उशिरापर्यंत दर्शनासाठी रांगा लागलेल्या होत्या.
सोहळ्यासाठी विविध भागांतून भाविक मोठ्या संख्येने दाखल झाले होते. घोटी, भावली, शुक्लतीर्थ तसेच परिसरातील अन्य शिवमंदिरांमध्येही दर्शनासाठी भक्तांची गर्दी झाली. कावनई येथे भाविकांसाठी सुमारे 20 क्विंटल खिचडीचा महाप्रसाद वाटप करण्यात आला. ट्रस्टतर्फे सीसीटीव्ही कॅमेरे बसविण्यात आले होते; मात्र तरीही चोरीच्या काही घटना घडल्याची चर्चा भाविकांमध्ये होती. यात्रेनिमित्त राज्य परिवहन महामंडळाने विशेष बसफेर्‍यांचे नियोजन केले होते. इगतपुरी, सिन्नर, अकोले, येवला व नाशिक आगारांतून विशेष बसेस सोडण्यात आल्या. घोटी-इगतपुरी-टाकेद मार्गावर दिवसभरात सुमारे 60
फेर्‍या झाल्याची माहिती वाहतूक निरीक्षक कैलास नाठे यांनी दिली. तसेच इगतपुरी आगारात तात्पुरते बसस्थानक उभारण्यात आले होते. यात्रेमुळे स्थानिक व्यावसायिकांना चांगली उलाढाल झाली असून, लाखो रुपयांचा व्यवहार झाल्याचा प्राथमिक अंदाज व्यक्त केला जात आहे. मात्र, बारावीच्या परीक्षा सुरू असल्याने यंदा अपेक्षित तितकी गर्दी नसल्याचेही काहींचे मत होते. दरवर्षी चार ते पाच लाख भाविक येथे येतात, असे स्थानिकांचे
म्हणणे आहे.
वाहनतळाची अपुरी व्यवस्था, रस्त्यावर अनियमित पार्किंग तसेच खिसेकापूंच्या तक्रारी अशा काही अडचणी यावेळी जाणवल्या. दुचाकीसाठी 50 रुपये व चारचाकीसाठी 100 ते 200 रुपये पार्किंग शुल्क आकारले जात असल्याबाबत काही भाविकांनी नाराजी व्यक्त केली. महिलांच्या सुरक्षेचा प्रश्नही उपस्थित करण्यात आला. दरम्यान, पोलीस निरीक्षक विजय शिंदे यांच्या मार्गदर्शनाखाली ठिकठिकाणी पोलीस बंदोबस्त तैनात केला होता. कावनई येथे दिवसभरात सुमारे एक लाख भाविकांनी दर्शन घेतल्याची माहिती विश्वस्त कुलदीप चौधरी यांनी दिली. दोन-तीन ठिकाणी महाप्रसादाचे आयोजन केले होते. टिटोली येथील लिंगेश्वर महादेव मंदिरात दिवसभर भजन व रात्री कीर्तन कार्यक्रम पार पडला, तर कुशेगाव-किशकिंधानगरी येथेही विविध धार्मिक उपक्रम आयोजित करण्यात आले. श्री कपिल महामुनी आश्रम व लाइफलाइन ब्लड कॅम्प यांच्या वतीने श्रद्धा रावल यांच्या सहकार्याने रक्तदान शिबिर आयोजित केले होते. विविध महंत, विश्वस्त व स्वयंसेवकांनी यात्रेचे नियोजन व सेवाकार्यात सहभाग नोंदविला.
Ocean of devotees at Takeda-Kavanai