इलेक्ट्रिक बस डेपोसाठी ऑक्टोबरची डेडलाइन

नगरविकासच्या प्रधान सचिवांच्या सूचना

नाशिक : प्रतिनिधी
आडगाव परिसरात शंभर इलेक्ट्रिक बसेससाठी डेपो उभारला जातो आहे. सदर डेपो लवकरात लवकर करा, अशा सूचना राज्य शासनाचे नगरविकासचे प्रधान सचिव गोविंदराज यांनी महापालिका प्रशासनाला दिल्या. ऑक्टोबर अखेर डेपोचे पूर्ण काम मार्गी लागेल, असे महापालिकेच्या यांत्रिकी विभागाने म्हटले. दरम्यान, सिंहस्थापूर्वी नाशकात इलेक्ट्रिक बस धावणार आहेत.
नाशिक महापालिकेसह राज्यातील इतर शहरांसमवेत प्रधान सचिव गोविंदराज यांनी ऑनलाइन बैठकीद्वारे इलेक्ट्रिक बस(पीएमपी)साठी सुरू असलेल्या बसडेपोच्या कामाचा
आढावा घेतला.
यावेळी मनपा आयुक्त मनीषा खत्री, अतिरिक्त आयुक्त प्रदीप चौधरी, विद्युतचे अधीक्षक अभियंता अविनाश धनाईत, कार्यकारी अभियंता अनिल गायकवाड, यांत्रिकीचे कार्यकारी अभियंता बाजीराव माळी आदींसह उपस्थित होते. गेल्या वर्षापासून आडगाव येथे शंभर इलेक्ट्रिक बससाठी डेपो बांधला जात आहे. महावितरणकडून सप्लायसह इतर बारीकसारीक कामे अद्यापही सुरू आहेत.
केंद्र शासनाच्या पीएमईअंतर्गत नाशिकला शंभर बसेस मिळणार आहेत. पहिल्या टप्प्यात पन्नास बसेस येणार आहेत. नववर्षाच्या जानेवारीमध्येच सदर बसेस शहरात येण्याची अपेक्षा आहे. मध्यंतरी महावितरणकडून पॉवर सप्लाय वेळेत न मिळाल्याने त्याचा फटका कामाला बसला. सोमवारच्या बैठकीत प्रधान सचिवांनी डेपोचे कामे लवकर करण्याच्या
सूचना दिल्या.

डेपोसाठी केंद्र-राज्याची मदत

डेपोच्या कामासाठी एकूण सतरा कोटींचा खर्च करण्यात येतो आहे. सहा कोटी केंद्र शासन, चार कोटी राज्य शासनाने दिले असून, पॉवर सप्लायसाठी सात कोटी केंद्राने दिले आहे.