देवदर्शनासाठी जाणारी पिकअप विहिरीत कोसळली; आठ भाविकांचा करुण अंत

सहा जणांना जीवदान, सोलापूर जिल्ह्यातील दुर्घटना

सोलापूर : प्रतिनिधी
जिल्ह्यात अत्यंत हृदयद्रावक आणि भीषण अपघाताची घटना घडली. म्हसवड येथे देवदर्शनासाठी निघालेल्या भाविकांची गाडी रस्त्यालगतच्या एका उघड्या विहिरीत कोसळली. या भयंकर दुर्घटनेत गाडीतील आठ जणांचा मृत्यू झाला. सहा जणांना सुखरूप बाहेर काढण्यात बचाव पथकाला यश आले आहे. या घटनेमुळे संपूर्ण परिसरात मोठी हळहळ व्यक्त केली जात आहे.
चालकाचे गाडीवरील नियंत्रण सुटून हा अपघात झाल्याचा प्राथमिक अंदाज आहे. नाशिक जिल्ह्यातील दिंडोरी येथेही काही दिवसांपूर्वी असाच अपघात झाला होता. त्यानंतरही राज्यात उघड्या विहिरींबाबत कोणतीही उपाययोजना करण्यात आलेली नसल्याचे सोलापुरातील अपघातातून उघड झाले आहे.
उपलब्ध माहितीनुसार, हे सर्व भाविक एका वाहनातून म्हसवड येथे देवदर्शनासाठी निघाले होते. प्रवासादरम्यान सोलापूर जिल्ह्याच्या हद्दीत चालकाचे गाडीवरील नियंत्रण सुटले. रस्त्याचा अंदाज न आल्याने गाडी थेट रस्त्याच्या कडेला असलेल्या एका उघड्या आणि कठडा नसलेल्या विहिरीत कोसळली. गाडी थेट पाण्यात बुडाल्याने प्रवाशांना वेळेत बाहेर पडण्याची संधीच मिळाली नाही, ज्यामुळे ही मोठी जीवितहानी झाली.
अपघाताची माहिती मिळताच स्थानिक नागरिक, पोलीस आणि बचाव पथकाने तत्काळ घटनास्थळी धाव घेत युद्धपातळीवर बचावकार्य सुरू केले. मात्र, विहिरीत पाणी जास्त असल्याने आणि गाडी पूर्णपणे बुडाल्याने 8 भाविकांचा मृत्यू झाला. मृतांचे मृतदेह विहिरीतून बाहेर काढण्यात आले असून ते शवविच्छेदनासाठी नजीकच्या शासकीय रुग्णालयात पाठवण्यात आले आहेत. सर्व मृत हे पंढरपूर तालुक्यातील चिंचणी गावचे रहिवासी आहेत.
स्थानिकांच्या तत्परतेमुळे आणि बचाव पथकाच्या अथक प्रयत्नांमुळे गाडीतील 6 जणांना विहिरीतून जिवंत बाहेर काढण्यात यश आले आहे. या जखमींना तातडीने रुग्णालयात दाखल करण्यात आले असून त्यांच्यावर वैद्यकीय उपचार सुरू आहेत.
उघड्या विहिरींचा सुरक्षेचा प्रश्न ऐरणीवर
या दुर्दैवी घटनेनंतर रस्त्यालगत असलेल्या उघड्या आणि कठडा नसलेल्या विहिरींच्या सुरक्षेचा प्रश्न पुन्हा एकदा ऐरणीवर आला आहे. प्रशासनाने अशा उघड्या विहिरींना तातडीने कठडे बांधण्याची किंवा सुरक्षिततेच्या उपाययोजना करण्याची मागणी आता नागरिकांकडून केली जात आहे. देवदर्शनाच्या आनंदाने निघालेल्या भाविकांवर अचानक काळाने घाला घातल्याने संपूर्ण चिंचणी गावासह मृतांच्या नातेवाईकांवर दुःखाचा डोंगर कोसळला आहे.

मृतांच्या वारसांना पाच लाखांची मदत : मुख्यमंत्री

अपघातात भाविकांचा मृत्यू झाल्याची घटना अतिशय दुर्दैवी आणि दुःखद आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबीयांच्या
दुःखात आम्ही सहभागी आहोत. सुदैवाने सहा जणांचे प्राण वाचविण्यात यश आले आहे. त्यांच्यावर उपचार केले जात आहेत. जिल्हाधिकारी आणि पोलिस अधीक्षक दोघेही तातडीने घटनास्थळी रवाना झाले आहेत.
स्थानिक प्रशासनाशी आम्ही सातत्याने संपर्कात आहोत, असे मुख्यमंत्री देवेंद्र फडणवीस म्हणाले. या घटनेतील मृतांच्या वारसांना पाच लाख रुपये आर्थिक मदत राज्य सरकारकडून देण्यात येईल, अशी माहिती मुख्यमंत्र्यांनी दिली.

Pickup going for Devdarshan falls into well; eight devotees meet tragic end