बंद घर फोडून अडीच लाखांचा ऐवज लंपास

भामरे यांच्या पत्नी व मुले किराणा सामान घेण्यासाठी बाहेर गेले होते.

सिडको : विशेष प्रतिनिधी
किराणा आणण्यासाठी घराबाहेर गेलेल्या कुटुंबाच्या अनुपस्थितीचा फायदा घेत चोरट्यांनी बंद घर फोडून सोन्याचे दागिने व रोख रक्कम असा सुमारे अडीच लाख रुपयांचा ऐवज लंपास केला. ही घटना गंगापूर पोलीस ठाण्याच्या हद्दीतील काळेनगर येथे दिवसाढवळ्या घडली आहे
काळेनगर येथील ग्रेप सिटीमधील मेरॉट इमारतीत राहणारे फॅब्रिकेशन व्यावसायिक नरेंद्र भामरे यांचे घर 13 डिसेंबर रोजी सायंकाळी पाच ते साडेसहा या वेळेत फोडण्यात आले. भामरे यांच्या पत्नी व मुले किराणा सामान घेण्यासाठी बाहेर गेले होते. त्याचदरम्यान अज्ञात चोरट्यांनी बाल्कनीकडील दरवाजाचे कुलूप तोडून घरात प्रवेश केला. हॉलमधील काचेचा दरवाजा फोडल्यानंतर बेडरूममधील कपाटाचे कुलूप तोडून आतील दागिने व रोख रक्कम चोरून नेण्यात आली.
चोरट्यांनी घरातून सोन्याची माळ, दोन सोन्याच्या चैन, सोन्याची अंगठी, लहान मुलांचे सोन्याचे दागिने तसेच दोन लाख रुपये रोख रक्कम असा एकूण दोन लाख 39 हजार 500 रुपयांचा ऐवज लंपास केला. कुटुंबीय घरी परतल्यानंतर घरातील अस्ताव्यस्त अवस्थेमुळे चोरी झाल्याचे लक्षात आले. याप्रकरणी भामरे यांनी गंगापूर पोलीस ठाण्यात गुन्हा दाखल केला आहे. सहाय्यक पोलीस निरीक्षक आहिरराव पुढील तपास करीत आहेत.

Property worth Rs 2.5 lakhs looted after breaking into a locked house

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.