सिन्नरमध्ये बनावट देशी दारूकारखान्यावर धाड

14.37 लाखांचा मुद्देमाल जप्त, 11 लाखांची रोकड हस्तगत

सिन्नर : प्रतिनिधी
सिन्नर पोलिसांनी शहरातील द्वारकानगर परिसरात सुरू असलेल्या बनावट देशी दारू निर्मितीच्या कारखान्यावर धाड टाकत मोठी कारवाई केली. या कारवाईत देशी दारू तयार करण्यासाठी वापरण्यात येणारे रसायने, कच्चा माल, रिकाम्या बाटल्या, बनावट लेबले तसेच 11 लाख रुपयांची रोकड असा एकूण 14 लाख 37 हजार 380 रुपयांचा मुद्देमाल जप्त करण्यात आला आहे.
या प्रकरणी राहुल उर्फ सागर बबन आव्हाड (वय 33, रा. साई आनंद अपार्टमेंट, द्वारकानगर, उद्योग भवन, सिन्नर) याला ताब्यात घेण्यात आले आहे. त्याच्यासह दिनेश गायकवाड (रा. धुळे) हा साथीदार फरार असून, त्याचा शोध सुरू आहे.
सिन्नर शहरात वाढत असलेल्या गुन्हेगारीच्या पार्श्वभूमीवर पोलीस अधीक्षक डॉ. डी. एस. स्वामी यांनी अवैध व्यवसायांवर कठोर कारवाईचे आदेश दिले होते. त्यानुसार पेट्रोलिंग व गुप्त माहिती संकलन सुरू असताना पोलीस हवालदार निवृत्ती गिते यांना द्वारकानगर येथील साई प्राइड अपार्टमेंटच्या तळमजल्यावरील एका फ्लॅटमध्ये बनावट देशी दारू तयार केली जात असल्याची माहिती मिळाली.
या माहितीच्या आधारे पोलीस निरीक्षक हेमंतकुमार भामरे यांच्या मार्गदर्शनाखाली विशेष पथकाने छापा टाकला. तपासणीदरम्यान फ्लॅटमध्ये मोठ्या प्रमाणात दारू निर्मितीसाठी लागणारे साहित्य, रसायने, रिकाम्या बाटल्या आणि बनावट लेबले आढळून आली. तसेच रोख 11 लाख रुपयांसह एकूण 14.37 लाख रुपयांचा मुद्देमाल जप्त करण्यात आला.
याप्रकरणी सिन्नर पोलीस ठाण्यात गुन्हा रजिस्टर क्रमांक 438/2026 दाखल करण्यात आला असून, भारतीय न्याय संहिता 2023 मधील कलम 123, 318(4), अत्यावश्यक वस्तू अधिनियम कलम 3 व 7 तसेच महाराष्ट्र दारूबंदी कायद्यातील विविध कलमांन्वये गुन्हा नोंदविण्यात आला आहे.
ही कारवाई पोलीस अधीक्षक डॉ. डी. एस. स्वामी, अपर पोलीस अधीक्षक विमला एस. आणि उपविभागीय पोलीस अधिकारी कांतीलाल पाटील यांच्या मार्गदर्शनाखाली करण्यात आली. पोलीस निरीक्षक हेमंतकुमार भामरे यांच्या नेतृत्वाखाली पोलीस हवालदार गिते, बोराडे, गवंडी, बिडगर, टिळे, कोकाटे, काकड व साळवे यांच्या पथकाने ही कारवाई यशस्वीरीत्या पार पाडली. राज्य उत्पादन शुल्क विभागाचे पोलीस निरीक्षक शैलेंद्र मराठे यांचे पथकही या कारवाईत सहभागी झाले होते. पुढील तपास सहाय्यक पोलीस निरीक्षक रूपाली चव्हाण
करीत आहेत.

Raid on fake country liquor factory in Sinnar